Ниитә өрк-бүл болад…

Шидр Москва балһснд «Әрәсә» Төвд келн-улсин ниицлтин җил байрин бәәдлд секгдв. «Медрл» ниицәнә «Әрәсә өрк-бүлмүдин өрк» нертә гегән-герлин керг-үүлдвр болв. Орн-нутгин һардврин, Залврин элчнр, цергә шишлң керг-үүлдврин ветеранмуд , талын орнас ирсн күндтә гиичнр, Әрәсәд бәәдг 190 һар келн-улсин элчнр, ут тоодан дөрвн миңһн һар күн терүнд орлцв.

Тодлхд, 2025 җилин чилгчәр келн-улсин хоорндк хәрлцәнә Хүүвин гешүдин орлцлһтаһар болсн селвлцәнә йовудт татсн седвәриг Әрәсән Президент Владимир Путин дөңнәд, ирлцңгү зәрлг батлсн болдг.
Пүрвә өдрлә «Әрәсә» Төвд орн-нутгин регионмудас ирсн олн зүсн өңгтә ке-сәәхн хувцан өмссн улс цуглрв. Эврәннь төрскн келәр дууһан дуулад, эврә келн-улсин бииһән бииләд, олна оньг авлв.
Әрәсән Президент Владимир Путин тәәз деер һарад, орн-нутгин тууҗиг сергәһәд нүр үг келв.
– Әрәсәд бәәдг олн келн-улсин эклцнь юундв? Урднь славянск багмуд нег-негнәсн салу бәәдг билә. Хөөннь нег һазрт цуглрад, нег шаҗн, нег йосн бүрдәгдәд, эдн ханьцв. Тер мет хөөннь талдан олн келн-улс немгдәд, Әрәсән ханьд орад, эндр бидн делкәд кемҗәһәрн хамгин ик, ниитә орн-нутг болҗанавидн. Кезәнәс авн эндр күртл мана орн-нутгт олн келн-улсин элчнр ахнр-дүүнр мет байр-зовлңган әдл хувалцад, ниитәһәр бәәнә. Өдгә цагт болхла шишлң керг-үүлдврт орлцҗадг Әрәсән келн-улсин элчнр нег-негән ах-дү гиһәд, олна төлә даалһвран хамдан күцәҗәнә. Мел деер келгдсн цуг тоот мана орн-нутгин ниицлтиг ил герчлҗәнә,эндр бидн хамдан цуглрснь өвәрц йовдл болҗана – гиһәд орн-нутгин толһач Әрәсәд келн-улсин ниицлтин җил секгдсиг зарлв.
Орн-нутгин олн һазрас ирсн элчнрлә хамдан Хальмг Таңһчин делегац байрин керг-үүлдврт бас орлцв. Оютнр, таңһчин сойлын коллективсин баахн артистнр, олна бүрдәцсин нүүрләчнр терүнә ханьд орв.
Терүнәс нань Әрәсән регионмудт шишлң талвңгуд бүрдәгдәд, видеозалһлдана эв-арһар цугтаг хамцулҗадг би биилв. Б.Б.Городовиковин нертә баһчудын Герт мана таңһчин баһчуд ке-сәәхн хувцан өмсәд, терүнд бас орлцв.
Тер өдр «Әрәсә» Келн-улсин Төвд нертә спортсменмүдлә, көгҗмчнрлә, Әрәсән Баатрмудла олн зүсн харһлтс болв. Күн болһн бийиннь тускар келәд, тәвсн күслдән яһҗ күрсән цәәлһәд, дамшлтарн хувалцсн болдг.

КАРСАНА Евгения
(Эн төрәр цааранднь 3 халхд умштн)