Седвәртә бичкдүдин җисәнә тускар

Шидр «Калмыкия» таңһчин зәңгллһнә бүрдәцд «Нүүрләчнрин җисән» олна бүрдәцин үүлдврин тускар күүндвр болв. Әрәсән җисәнә Хальмг Таңһчд үүлддг әңгин һардач Анхана Саглр болн Орн-нутгин Хүүвд мана таңһчин элч Көкән Анастасия давсн җилд кеҗ-күцәсән ашлад, болн эн җил күцәгдх төсвсин тускар келҗ өгв.
Сүл то-дигәр, таңһчд үүлддг олна җисәнә ханьд 24 миңһн сурһульч орна. Таңһчин район болһна болн хотл балһсна сурһуль болһнд олна бүрдәцин әңгүд үүлднә. Олна җисәнә гешүд дунд нурһлҗ сурһулян йилһән сәәнәр сурдг, олна бәәдл-җирһлд шунмһаһар орлцдг, седвәртә, билгтә болн арһта күүкд-көвүд орна. Болв Анхана Саглрин келсәр, зөв-йос эвдәд дотр-дундын кергүдин цергллтин оньгт бәәдг насни дигт күрәд уга бичкдүд эдн дунд бас бәәнә, тегәд эдниг олна үүлдврт орлцулҗ, чик сурһмҗ өгх кергтә болна. Бичкдүд бийснь олн зүсн керг-үүлдврмүдин седвәр татад, билг-эрдмин наадм, марһас, хәләврмүд болн дамшлтын харһлтс давулна.
- Мана таңһчин элчнр «Зарница 2.0» марһанд сән белдвртәһән иткүлҗ орн-нутгин сән гисн һучн командын ханьд орснь ик күцәмҗ болв. Эн җил марһана йовудт «Өрк-бүлин зарниц» түрүн болҗ давулгдхмн, терүнд эк-эцкнр күүкдтәһән хамдан орлцҗ чадхмн. Эн җил марһа давуллһнд дәкәд нег шинрлт бәәнә, тиигәд 23 нас зүүсн баһчудт орлцх зөв өггдв. Эн марһан бичкдүдт төрскнч сурһмҗ өглһнд туслна. Лу сарин 23-ас авн муниципальн девсң экләд, таңһчин болн хөөннь орн-нутгин марһанд орлцх баг йилһҗ авгдхмн. Тер мет эврә сән дурар үүлддг оютнрла болн Улан Кирсин «Түрүн дөң», «Хамдан» гидг таңһчин бичкдүдин ниицәнлә хамцу керг-үүлдвр давуллһн сән авъяст тохрв, - гиҗ Анхана Саглр келв.
Эн өдрмүдт коммерческ биш бүрдәцс дунд «Нүүрләчнрин җисән» олна бүрдәцин мөрә шүүҗ авлһна марһан эклснә тускар бас онц келгдв. Тиигәд, сурһуль-эрдмин, сойлын, спортын олна бүрдләцс бичкдүдт чик сурһмҗ өглһнә, эднә билг-эрдм делгрүллһнә төсвс бәәдл-җирһлд тохрахин төлә мөрә шүүҗ авч чадҗана. Таңһчин олна бүрдәцин мергҗлтнр марһанд орлцхд дөң-тусан күргҗ, кергтә бәрмт цаас белдхд нөкд болхмн. Эн марһан 2023 җиләс авн давулгдҗана. Мана таңһчин элчнр орлцад, 10 сай арслңга мөрә шүүҗ авсн билә. Харм төрхд, 2024-2025 җилмүдт таңһчин элчнр диилвр бәрҗ чадсн уга. Эн җил терүнд орлцх бүрдәцс эрк биш диилвр бәрх гиҗ таңһчин әңгин һардвр ицҗәнә. Келхд, төсв күцәлһнд 10 сай һар арслң мөрә шүүҗ авч болҗана. Марһана некврәр бичкдүд бийснь ямр нег керг-үүлдвр күцәлһнә седвәр татад, төсв белдх зөвтә.
Көкән Анастасия хотл балһсна 3-ч тойгта дунд сурһульд сурна, эн «Нүүрләчнрин җисән» бүрдәцин Орн-нутгин Хүүвд мана таңһчин элч болҗ үүлднә. Күүкнә келсәр, Орн-нутгин Хүүв керг-үүлдврмүдин зура белднә, әңгүдин шунлтта гешүдин сурһуль давулна. Ода Сарпан района Садовое селәнд «Нүүрләчнрин сурһуль» керг-үүлдвр давулхар белдвр кегдҗәнә. Нидн тиим керг-үүлдвр Көтчнрә районд давулгдсн билә. Бичкдүдин олна җисәнә үүлдврт ах үүрмүднь дөң-тусан күргҗ, дамшлтарн хувалцдгиг харһлтд орлцачнр онц темдглв. Тиигәд, «Дәәч» цергә болн спортын белдврин төвин көдләчнр, дунд сурһульмудын багшнр эднд сурһмҗлгчнр болҗ, керг-үүлдврмүд давуллһнд дөңгән күргнә. Җил ирвәс олна бүрдәцин зергләнд орсн бичкдүдин то өсчәхнь байрта гиҗ Анхана Саглр келәд, седвәртә күүкдт эднә ханьд орх дуудвр кев.
ДООҖАН Наталья