Баһ наста багшнрла дамшлтарн хувалцад

Одахн Городовиковск балһсна 3-ч тойгта сурһульд баһ наста болн дамшлтта багшнрин таңһчин селвлцән болв. Эднә нөкцлтиг өргҗүләд баһчудын мергҗлтинь өөдлүллһнә төрәр күүндв болв. Тиим җисән таңһчд өргҗәд йовхла, терүнә ашт ик сурһулян төгсәсн мергҗлтнрин эв-довнь болн дамшлтнь өсх зөвтә. Эн керг-үүлдврт «Хальмг Таңһчин җилин багш» гидг таңһчин болн райодын марһана дииләчнр, Городовиковск, Приютна болн Яшалтан райодын бичкдүдин садмудын сурһмҗлачнр, дунд сурһульмудын болн СПО-н бүрдәцсин багшнр, «Пеликан» болн «Постижение» муниципальн клубмудын гешүд орлцв.
«Җилин багш» гидг Цугәрәсән марһанд орлцсн багшнр эрдмин кичәлән давулв. Тер тоод Элст балһсна һардврин ахлачин дарук Довгопола Дмитрий тууҗин болн обществознаня кичәлмүдәр дамшлтарн хувалцв. Әрәсән улсин ниицлтин җилин төрәр мергҗлтнр бас ухан-тоолврарн хувалцв гиҗ келх кергтә. Тер мет селвлцәнә көтлврт ил кичәлмүд, лекцс бүрдәгдв. Энд марһана дииләчнр өдгә цагин кесг эв-арһан үзүлҗ, баһ наста багшнрин седвәриг дөңнв.
- «Җилин багш» гидг марһан Хальмг Таңһчд 1990 җиләс авн бүрдәгдҗәнә. Мергҗлттә багшнрин то икдүллһнә, дамшлтарн хувалцлһна болн сурһуль-эрдмин салврт өдгә цага эв-арһс өргнәр олзллһна төрмүдәр марһанд күүндвр болна, - гиҗ Городовиковск районд «Пеликан» болн «Постижение» муниципальн клубмудын үүлдвриг өргҗүллһнә бүрдәцин һардач, Кировск лицейиг һардҗадг Татьяна Химочкина тоолвран келв.
Эднә лицейд ода баһ наста мергҗлт Дарья Михайлова көдлҗәнә. Эн Хальмг ик сурһулин медлд үүлдҗәдг Башантан колледжд эклц классин багшин эрдм холас дасчана, ода Кировск лицейд олна керг-үүлдвр бүрдәлһнд орлцна. Тиигҗ баһ наста мергҗлт иргч көдлмштән белдҗәнә гиҗ сурһулин һардач Дарья Михайлован тускар келнә.
1992 җиләс авн «Җилин багш» гидг марһан Хальмг Таңһчд җил болһн бүрдәгддг болв. 2025 җилд Городовиковск балһсна 3-ч тойгта сурһулин орс келнә болн утх-зокъялын багш Анастасия Кривенец марһана дииләч болв. Дарунь эн Санкт-Петербургд болсн «Җилин багш» Цугәрәсән марһанд орлцҗ, дамшлтарн хувалцла. Марһана дииләч бас селвлцәнд орлцҗ ил кичәлән давулв. Терүнә өмн Анастасия Владимировна «Күч-көлснә хаалһан эклҗәдг багш» марһанд диилвр бәрлә, гиҗ Татьяна Ивановна билгтә багшиг буульҗ келв.
Тиим кевәр Городовиковск балһснд болсн таңһчин селвлцән баһ наста багшнрт урмд өгч, теднә дамшлтынь байҗулв. Кировск лицейд билгтә баһ наста багшнр бас бәәнә. Үлгүрнь, биологин багш Балыка Данара муниципальн марһанд орлцҗ 2-ч орм эзлв, лицейд агроклассмудын көдлмшиг дигтә-даратаһар бүрдәлһнд орлцна. Эн сурһулин бүрдәцд эклц классин сурһульчнрас авн 8-ч класс күртл цуг күүкд урһмл тәрлһнә көдлмш күцәнә. «Әрәсән орлятмуд» гидг җисәнә ханьд бичкдүд селәнә эдл-ахун көдлмшт орлцдг болв. Лицейин өөр-шидрк һазрин әңгд эдн болн ах классин сурһульчнр тәрә тәрнә, тер тоод Хальмг ик сурһулин номтнрин селвгәр һазриг көдәрлһнәс харсдг урһмл тәрҗ сән урһц авна.
Зәрм сурһульчнр селәнә-ахун төрәр соньмсад, Башантан колледжин оютнр болад, малын эмчин эрдм дасчахнь темдгтә. Теднә үлгүр иргчдән талдан арвтнрт урмд өгәд бәәх гиҗ сангдна. Талдан чигн кичәлмүдт лицейин ах классин сурһульчнр гүн медрл авна, дамшлтта багшнр эдниг сурна. Селвлцәнд эдн бас хоршасн ховр дамшлтарн хувалцҗ, баһ наста багшнрт сүв-селвгән өгв. «Җилин багш» җисән министерствин һардврин дөң-тусар җил ирвәс өргҗәд йовх гиҗ нәәлҗ болҗана. Ах үйин багшнрин үлгүрәр баһчуд дунд сурһульмудт олар ирҗ көдлх гисн иткл үүднә.

ТҮРВӘН Һуна