Мал өсклһнд-һол оньг

Шидр таңһчин селәнә эдл-ахун министр Гаван Тимур Приютна районд одад, «Агрофирма Уралан» ООО-д үвлзлһнә кем яһҗ давҗахинь бүрткв.
– Нидн тенд һурвн миңһн толһа бод мал багтамҗта бордлһна талвң шишлң кергсләр теткгдсн билә. Өдгә цагт эннь таңһчин нүүрлгч эдл-ахусин тоод йовна. Мана таңһчд мал бордлһна талвңгуд тосхгдад, мал өсклһнә халхиг улм делгрүллһнд туслҗана. Тегәд үвлин цагт малан һару угаһар асрх таал учрна, – гиҗ Гаван Тимур темдглв.
Тер мет министр малын дунд хальдврта гем түглһнә төрәр бас күүндв. Үвлзлһнә дааврта кемд белдәд, эдл-ахуд ветеринарн керг-үүлдврмүд күцәгдв.
Сүл җилмүдин туршарт Хальмгт өдгә цагин некврлә ирлцҗәдг бордлһна зун һар талвң тосхгдхнь лавта. Шаңһа дем олзлад, мал өсклһнә халхар өвкнрин дамшлтыг учртан авч, селәнә эдл-ахун арһлачнр таңһчин экономикин делгрлтд тәвцән орулҗана.
Темдглхд, тохма бод малыг олар асрҗадг мана таңһч Әрәсән регионмуд дунд нүүрт йовна. Хальмгин селәнә эдл-ахун министерствин зәңглсәр, эн җил мана таңһчд мал өсклһнә делгрлтд шаңһас 500 сай арслң йилһгдхмн.

КАРСАНА Евгения