Таңһчин марһанд белдҗәнә

Өдгә цагт таңһчин цуг колледжмүд лу сарин 15-д эклсн «Эрдмчнр» гидг таңһчин марһанд орлцҗана. Арвн җилин туршт мана таңһчд «Эрдмчнр» болн эрмдгтә улсин төлә «Абилимпикс» төсвс күцәгдҗәнә», - гиҗ одахн болсн күүндврин йовудт таңһчин сурһуль-эрдмин болн номин министерствин ах мергҗлт Муеван Кермн келв.
Җил ирвәс марһана чинрнь өсәд-өргҗәд йовна, гиҗ Кермн Викторовна темдглв. Колледжин улд тааста эрдм дасхар седҗәдг баһчудын то бас өсәд йовна. Эн җил 3 минһн арвт 9-ч классан төгсәх, эднә 30 процентнь цааранднь колледжд орх саната, җил ирвәс теднә то икдәд йовх гиҗ бат ицгтә бәәнәвидн. Терүнә төлә өдгә цага кесг эрдм таңһчин дунд сурһуль-эрдмин бүрдәцст секгдҗәнә. Шаңһа болн таңһчин демәр колледжмүдт ховр шин кергслтә 26 мастерской секгдв, тернь марһанд улм сәәнәр белдх арһ өгнә. Тиим кевәр марһаг дигтә-даратаһар бүрдәхин төлә цуг таал бәәнә, гиҗ министерствин ах мергҗлт заав.
Тер мет СПО-н бүрдәцсин багшнрин болн шишлң эрдмчнрин мергҗлтиг өөдлүлхин төлә тедн дунд марһан бүрдәгднә. Терүнә дииләч орн-нутгин марһанд орлцна, ашлгч дөрлдән җил болһн хулһн сарин 2-т СПО-н көдләчин сән өдр угтҗ болна. Әрәсән марһана дииләчин төрскн балһснд дарани марһан бүрдәгднә. Давсн җилд Курск балһснд болсмн, эн җил Ямало-Ненецк дуһргин Салехард балһснд давулгдхмн. Таңһчин колледжмүдин багшнр болн эрдмчнр Элстин политехникин колледжин улд үүлддг, өдгә цага белдврин төвд дөрлдх.
Эдн зурһан җилин эргцд «Җилин урч» марһанд орлцҗана. Энд хулд-гүүлгәнә технологин урчнр һурвн дәкҗ, Элстин багшин колледжин элчнр хойр дәкҗ диилвр бәрв. Колледжин девсңд 40 күн орлцх, эднәс диилвр бәрсн 11 багш болн эрдмч мөрн сард таңһчин дөрлдәнд мергҗлтән сөрх.
Цааранднь таңһчин «Эрдмчнр» марһана тускар улм тодрхаһар хулд-гүүлгәнә –технологин колледжин һардачин дарук, зүүцүллһнә таңһчин төвин толһачин дарук Һооҗан Светлана келв. Таңһчин дөрлдән лу сарин 15-ас авн 20 күртл болхмн. Терүнд сурһульмудын арвтнр бас дөрлдх. Колледжмүдин оютнр болхла 21 әңгд чидлән болн эв-дован сөрх. Эн җил ишкә кегдлмүд келҗ һарһлһна болн йосн биш ухана туск хойр шин әңг орулгдв, «Тамрин сойл болн спорт» гидг әңг немгдв гиҗ Светлана Николаевна цәәлһв.
Ут турштан марһанд 151 оютн орлцх, теднәс негнь Луганск Улсин Республикәс ирх. 242 шинҗләч, тер тоод колледжин багшнр, эрдмчнр, бизнесин элчнр жюрин ханьд орхмн. Иргчдән эднә бүрдәцд көдлх мергҗлтиг эдн шүүҗ авх. Нүүрлгч орм эзлсн арвтнр таңһчин бүрдәцст немр дамшлт авна. Марһана йовудт 81 дииләч йилһгдх.
Марһана йисн талвңд оютнр эрдмин эв-дован үзүлҗ дөрлдхмн. Һоллгч талвң хулд-гүүлгәнә-технологин колледжд бүрдәгдх, энд замчнр, кондитермүд, арһлачнр, финансистнр дииләчин нер зүүхин төлә марһлдх, тер мет арвтнрин хойр баг чидлән сөрх.
Цааранднь келхлә ЭПТК-д веб-дизайнермүд болн программистнр, багшин колледжд эклц классин багшнр, Городовиковск балһсна олн салврта СПО-н бүрдәцд, Башантан колледжд машинә ясачнр, РГУ-н соцтехколледжд компьютерин технологин эрдмчнр марһлдх болҗ һарв.
Тер мет күүндврт орлцҗ Х.Кануковин нертә багшин колледжин әңгин һардач Адьяна Тамара, өдгә цага эрдмин белдврин төвин толһач Абушинә Олег, эн колледжин шишлң кичәлмүдин багш Басңга Арслң бас ахр зәңгллһ кев.

ТҮРВӘН Һуна