Цергчнрин төрмүдт орлцв

Хальмг Таңһчин Улсин Хуралын (Парламентин) Ахлач Артем Михайлов әмтнлә харһад, тедниг үүмүлҗәдг төрмүдәр дөңгән күргв. Харһлтд таңһчд күүнә зөвин элч Валерий Чуб орлцад, цәәлһвр өгв.
Тиигәд, харһлтд ирсн цергә шишлң керг-үүлдврт орлцач, һазрин әңг авлһна онц төр босхв. Артем Михайлов СВО-н орлцачнрт һазрин әңг һарһҗ өглһнә диг-дарана тускар тодрхаһар цәәлһәд, эн төриг онц бүрткх болв. Эн төрәр таңһчин Улсин Хуралын һардврин көдләчнрт бас даалһвр өггдв. Цергә шишлң керг-үүлдврин йовудт кесг сардан зәңг-зә уга дәәчин элгн-садн дөңгән күргхиг сурхар ирв. Тер дарунь цергчин тускар медҗ авхин төлә бичгүд болн эрлһс белдхин туст селвг өггдәд, эн төр хаһлхд дөң-тусан күргхәр үгән өгв.
Төрскән харсачин өрк-бүл болһнд килмҗән тусхаҗ, эднә төрмүдт эрк биш орлцх кергтә. Өөрхн улсинь үүмүлҗәдг сурврмудар цәәлһвр өгч, дөңгән күргх зөвтәвидн. Олн сардан зәңгән эс өгчәдг цергчин тускар цугинь медҗ авх кергтә, - гиҗ Артем Васильевич келв.
Ирлцңгү йовдл учрсн болхла шишлң бүрдәцст эрлһ орулҗ өглһнә диг-дарана тускар Валерий Чуб цәәлһвр өгәд, дәәч зәңг-зә уга геедрсиг иткүлхин төлә ямаран керг-үүлдвр күцәхиг заав. Күүнә зөв харсдг элч эн төриг бас бүрткәд, нөкд болхан медүлв.
Батан Сәәхлә