Шаҗна элчнр харһв

Лу сарин 15-д Хазна кафедральн чонҗин гегән-герлин төвд Әрәсәд зарлгдсн келн-улсин ниицлтин җилд нерәдсн сүүр болв. Шаҗн Лам гевш Тензин Чойдак болн Элстин болн Хальмгин архиепископ Юстиниан, таңһчин мусульман улсин муфтий Солтанахмед Каралаев терүнд орлцв. Цаһан Сар, Масленица болн Рамадан әрүн сар эклһиг угтҗ, шаҗна элчнр харһв.
Әрәсән Президент Владимир Путин келн-улсин ниицлтин җил гиҗ зарлгдснас иштә эврә шаҗан харҗ, ниицлтиг хадһлхмн, гисн дуудвриг шаҗна элчнр олнд медүлв.
Күн болһн ямаран шаҗнд шүтдг болв чигн хамгин түрүнд өвкнрин заясн авг-бәрциг, байн дамшлтыг болн келн-улсин хоорндк хәрлцәг күндлҗ, дорас өсч йовдг үйнрт медүлх зөвтә гиҗ харһлтын йовудт келгдв.
– Эн җил, Цаһан Сар, Масленица, Рамадан әрүн сар ирлцснь темдгтә, тер юңгад гихлә бидн байр-зовлңган әдл хувалцҗ, нег-негән дөңнҗ, чинртә йовдлмудан хамдан темдглнәвидн, гиҗ архиепископ Юстиниан келв.
Муфтий Солтанахмед Каралаев болхла, мана таңһчд дорас өсч йовдг баһчудт әрүн чинртә чик сурһмҗ өгчәхиг темдглв. Тер төләд бидн олн җилдән хоорндан ниитәһәр бәәнәвидн гив.
– Нег орн-нутгт, нег таңһчд бәәдг келн-улс ах-дүүһинәр бәәҗ, нег-негнәннь тууҗ, авъяс-заңшал, сойл медәд, күндләд, улсин хоорндк хәрлцәг улм батрулх зөвтә. Деер келгдсн тоот мана орн-нутгин күчн болн ниицлт мөн, – гиҗ Шаҗн Лам гевш Тензин Чойдак тоолврарн хувалцв.
Сүүрин йовудт «Веснушки» ансамблин бичкдүд бииләд, сергмҗ үүдәв. Әрәсәд бәәдг олн келн-улсин элчнрин көвүд-күүкд билг-эрдмәрн бас байрлулв. Харһлтын чилгчәр бичкдүдин ансамбль шаҗна хоорндк Хүүвин Күндллһнә һашгар ачлгдв, көвүд-күүкдт болхла әмтәхн белгүд бәрүлҗ өггдв.

КАРСАНА Евгения