Әрәсән олн улсиг хамцулҗ

Урҗ өдр Элстд бичкдүдин үүдәлтин Бәәшңд Әрәсән келн-улсин ниицлтин җилд нерәдсн керг - үүлдвр болв. Энүг «Медрл» ниицәнә гешүд бүрдәҗ давулв. Элстин кесг салврин бүрдәцсин баһ наста көдләчнр, багшнр энүнд орлцв. Хургиг «Медрл» ниицәнә гешүн, Элст балһсна толһачин дарук Дмитрий Довгополов һардҗ цәәлһвр өгв.

Әрәсән келн-улсин ниицлтин җил секлһнә ик керг-үүлдвр Москвад «Медрл» ниицәнә седвәрәр болв. Терүнд Әрәсән Президент Владимир Путин орлцҗ, җил эклсиг зарлв. Хальмг Таңһчин баһчудын делегац бас тер ик хургт талдан регионмудын элчнрлә таньлдҗ, кесг шин тоот һәәхҗ мана таңһчин тускар цәәлһв. Москвад болсн ик керг-үүлдврин тускар «Калмыкия 24» телеүзлин баһ наста көдләч Бембин Алтана тодрхаһар келв.
Тер мет СВО-н йовудт цергә иньгллтин хәрлцәнә тускар цергә шишлң керг-үүлдврин ветеран Мингиян Нахошкин келҗ өгв. 1946 җилд Элстд Христос Бурхн дүрән үзүлснә туск тууҗин тускар орс чонҗин элч Алексей Грищенко цуглрсн улст келснь соньн болв. Элстд эн өвәрц йовдлын 80 җилин өөниг өргнәр темдглхәр зуралҗана. Мана таңһчин кесг келн-улсиг эн йовдл бас хамцулҗана.
ТҮРВӘН Һуна