Олна иньгллт – мана күчн

Әрәсән улсин ниицлтин җилд нерәдгдсн керг-үүлдврмүд орн-нутгин балһсдар, селәдәр бүрдәгдҗ, олн келн-улс хоорндк залһлдаг батрулҗана. Шидр Ростов-на-Дону балһсна Октябрьск района 32-ч тойгта дунд сурһульд болсн байрин керг-үүлдврт орс, хальмг, бурят, корей, азербайджан, маңһд болн нань чигн талдан келн-улсин элчнр харһад, билг-эрдмән үзүлв.

- Бидн хам-хоша бәәдг Ростовск мүҗлә бат залһлда бәрҗ, нег-негндән гиичлҗ хамцу керг-үүлдврмүд давулнавидн. Ростов-на-Дону балһсна Октябрьск района һардврин үрврәр бидн Әрәсән улсин ниицлтин җилд нерәдгдсн байрт орлцад, хальмг улсин сойлла, тууҗла таньлдулҗ, билг-эрдмән үзүлвидн. Мана района сойлын әңгин медлд «Бадм цецг» гидг келн-улсин сойлын төв үүлднә, тегәд бидн хальмг улсин авг-бәрцин, сойлын тускар олнд медүлвидн. Байрин керг-үүлдврт орлцсн келн-улсин ниицәс соньн һәәхүл белдв. Бидн гиичнрән өвкнриннь авъясар хальмг зандн цәәһәр тосад, цаһан хадг татвидн, - гиҗ Городовиковск района сойлын әңгин һардач Шорван Галина келв.
Делегацин ханьд «Иньглән» ансамблин һардач Увшан Надежда болн уйн наста биичнр, Виноградное селәнә сойлын Герин көдләч Олег Нарыжный, Городовиковск балһсна 3-ч тойгта дунд сурһулин багш Дельдюгинә Полина, Городовиковск балһсна сойлын Герин методист Алена Ефремова хальмг улсин сойлын тускар олнд медүлв. Тиигәд, Дельдюгинә Полина «нәрн шинҗин» туск дамшлтын кичәл үзүлв, Олег Нарыжный домбр цокад, гарма татад, олна оньг авлв. Уйн наста биичнрин билгнь олн-әмтнә зүрк авлв.
Байрин керг-үүлдврт Октябрьск района сурһуль-эрдмин бүрдәцс орлцв. Бичкдүд иньгллтин, олн келн-улсин ниицлтин туск шүлгүд айслулҗ умшв, ду-би үзүлв, келн-улсин сәәхн хувц өмсәд кеерв. Ростовск мүҗин күцәгч болн зака үүдәгч бүрдәцсин элчнр йөрәлин үг келәд, мана орн-нутгт бәәдг олн келн-улс ниитәһәр бәәхиг темдглв. Эн байрт орлцсн орс, хальмг, корей, маңһд болн талдан келн-улсин элчнр хамдан нег тәәз деер һарч, иньгллтин туск ду дуулв.

БАТАН Сәәхлә
ЗУРГТ: Городовиковск района делегац байрин керг-үүлдврт орлцв