«Хамдан» билгтә баһчудыг негдүлх

Моһа сарин 17-18-д Элстд «Хамдан» нертә билгтә баһчудын таңһчин марһан арвн тавдгч кемдән давулгдхмн. Әрәсән улсин ниицлтин җиллә ирлцҗ эн марһана көтлвр бүрдәгдхмн.
Энүнә тускар шидр баһчудын олна бүрдәцсин элчнр таңһчин седкүлчнрт тодрхаһар келҗ өгв. Мана таңһчд баһчудын билгинь делгрүлхин төлә «Хамдан» марһан-наадм давулгдна.
– Марһана йовудт дорас өсч йовдг баһчуд хоорндан таньлдад, олн үүрмүдән олад, төрскнч седклтә, чик сурһмҗта, өвкнрин зөөрән хадһлҗ, таңһчиннь хәәртә үрд болҗ өсхнь лавта, – гиҗ таңһчин баһчудын Төвин элч Басңга Любовь темдглв.
«Движение Первых» җисәнә төсвс күцәлһнә әңгин һардач Нармин Баина марһана көтлврин тускар цәәлһв. Энүнә келсәр, моһа сарин 17-д Чонкуша Петрин нертә билг-эрдмин колледжд билгтнриг йилһҗ авлһна девсң болхмн. Марһанд 10-ас авн 17 нас күрсн арвтнр орлцҗ чадҗана. Көвүд-күүкд ду дуулад, би бииләд, шүлгүд айслулҗ умшад, көгҗмин зевсгүд цокад, зургуд зурад болн талдан марһаст орлцхмн. Ут тоодан эдн нәәмн әңгәр марһлдхмн гив.
– «Хамдан» марһан-наадмд орлцхар 200 шаху күн эрлһән орулсн бәәнә. Таңһчин хол райодас ирсн элчнрт Элст балһсна гиичлүрмүдт шишлң ормс йилһгдх болв. Темдглхәс, марһан-наадм бүрдәлһнә көдлмшиг цугинь баһчуд эврән кенә. Көвүд-күүкд хамдан цуглрад, кен-негән соңсад, седвәрән орулад, хамцу үүлдврин йовудт олн дууһарн ашинь һарһв, – гиҗ «Хамдан» бүрдәцин һардач Цеднә Виктория келв.
Моһа сарин 18-д марһан-наадмин ашлгч концерт болхмн. Күндтә жюрин ханьд таңһчин нертә билгтнр орхмн, тедн дунд Манҗин Баатр, Шаран Дмитрий болн талдан улс мөн.
Онц темдглхәс, Луганск Улсин Республикин Антрацит балһснас билгтә коллектив марһана күндтә гиич болад, ашлгч концертд бас орлцхмн.
ОЛЬДАН Цаһан