Эмчнр дәкәд хойр селәнд одв

Урҗ өдр Городовиковск района Веселое болн Лазаревское селәдт «Эрүл-менд бәәтн!» гидг керг-үүлдврин йовудт эмчнрин баг көдлв. Селәнә эмнлһнә фельдшер Галина Мельник урдаснь бәәрн улст эмчнр ирхин тускар медүләд, хуучта, гемтә-шалтгта улст болн цергә керг-үүлдврт орлцачнрин өрк-бүлмүдт ямаран мергҗлтнрин селвг кергтәһинь диглв. Галина Николаевна Сарпуль балһснд медицинск училищ төгсәһәд, 1983 җиләс авн энд көдлҗәнә. Бәәрн улс эрүл-менд харлһна көдләчиг күндлнә, цаһан седклднь ханна. Кенд ямаран шинҗллт кехинь, ямаран эмнлһ авхинь эн бүрткҗ, күн болһнд килмҗән тусхаҗ, кениг чигн оньгасн алдхш гиҗ селәнәхн буульмҗтаһар келнә.
- Мана әмтиг Виноградное селәнә эмнлһнә эмч Зольвана Людмила хәләнә, долан хонг болһн нааран ирәд дөңгән күргнә. Людмила Александровна бас эрүл-менд харлһна ветеран мөн, эн дөчн һар җилдән эмчәр көдлҗәнә. Эн керг-үүлдвр мана селәнд болхиг медәд, урдаснь олн зүсн шинҗллт кегдв. Әмтн флюорографь, маммографь, УЗИ кехин төлә Яшалтан эмнлһнәс шишлң көлгн ирв. Ода мана селәнд 310 күн бәәнә. Цуһар эндр эмчнрт бийән үзүлхәр ирв. Района, таңһчин эс гиҗ хам-хоша регионмудын эмнлһнд одхин ормд гертән мергҗлтнрлә харһҗ, эрүл-мендин бәәдлән шинҗлҗ болхиг селәнәхн байртаһар тосв, - гиҗ Галина Николаевна келв.
Веселое селәнә медәтнрт, цергә шишлң керг-үүлдврт орлцачнрин эк-эцкнрт онц оньг тусхагдсмн. Селәнд СВО-д орлцсн ветеран Виктор Новиков бәәнә, эн бас эмчнрт бийән үзүлхәр ирв. Энүнд зүркнә эмч кергтә.
Городовиковск района эмнлһнә ах эмчин үүл дааҗадг Наган Руслана келсәр, таңһчин Толһачин седвәрәр эмчнр хол селәдәр йовад, бәәрн улст дөңгән күргҗәхнь темдгтә. Селәнә әмтнд мергҗлтнр ирснь хойр дам тааста болв. Зәрм улст района болн таңһчин эмнлһст одх арһ уга болна, дәкәд зәрмнь хам-хоша балһсдт одад шинҗллт кехин төлә баһ биш мөңгән һарһна. Ода болхла кесг мергҗлтнр нааран бийснь ирәд, эмнлһнә туст селвгән өгч нөкд болв. Хол селәдт бәәдг әмтн иим туста керг бүрдәгдснд ханлтта бәәнә. Эмчнрин хәләврт орсн улст немр шинҗллт эс гиҗ эмнлһн кергтә болхла бидн эднд дөң болхвидн. Таңһчин эрүл-менд харлһна министерств эн төр хаһлхд тусан күргнә гиҗ Руслан Топаевич темдглв.
Келхд, района эмнлһнәс хирург Коршан Владимир, отоларинголог Дорҗин Эльза, невролог Петрян Ольга, күүкд улсин эмч Наталья Грищенко, УЗИ-н эмч Цеднә Виктория ирв. Яшалтан эмнлһнә зүркнә эмч Кичгә Кемә, таңһчин эмнлһнә эндокринолог Манган Байрта болн нүднә эмч Дорҗин Зоя эднд нөкд болв. Яшалтан района эмнлһнә маммографь болн флюорограф шинҗллт кехд олзлгдв.
Үдин хөөн эмчнр Лазаревское селәнд одв. Энд селәнә эмнлһнә эмч Харинә Людмила бас эртәснь эн керг-үүлдврин тускар зәңгләд, хуучта, эрмдгтә улст эмчнрт ирх үрвр кев. Людмила Олеговнан келсәр, селәнд күсдундур миңһн күн бәәнә. Эн «Земск эмч» гидг көтлврин йовудт тавн җил хооран нааран ирв. Ростов-на-Дону балһснд ик сурһульд сурад, тенд күч-көлснә хаалһан экләд, арвн җилдән эмчәр көдлсмн. 2021 җилд эн төрскн һазртан ирҗ көдлх шиидвр авв. Темдглхәс, селәнә эмнлһнд экнь Зоя Борисовна эмчәр бас көдлҗәнә, тегәд күүкндән ямр нег төрәр селвг өгч дөңгән күргнә.
Селәнә эмнлһнд дундын көдләчнр Яна Емцева болн Алина Симбирцева чадмг кевәр көдлҗ, бәәрн әмтнд туста болхар шунна. Эн керг-үүлдврин өмн өргнд эдн әмтнә эрүл-мендин шинҗллт кев, тегәд эмчнрт эмнлһнә туст селвг өгхд тернь туста болв.
Эмчнр эн керг-үүлдврт орлцхар ирсн улсиг цугтаһинь хәләһәд, эдниг үүмүлҗәдг төрмүдәр цәәлһвр өгәд, эрүл-мендән батруллһна туст селвгәрн хувалцв. «Эрүл-мендин төв» бүрдәцин мергҗлтнр зүркнә судцин шинҗллт кеһәд, чик авг-бәрцин тускар болһнла күүндв.
- «Эрүл-менд бәәтн!» гидг керг-үүлдврин йовудт Весёлое болн Лазаревское селәдт ут тоодан 149 күн орлцв, тер тоод цергә керг-үүлдврт орлцсн 2 ветеран болн СВО-д орлцачнрин өрк-бүлмүдин 5 гешүн мөн. Теднәснь 17 күүнд ямр нег гем түрүн болҗ илдкгдснәс иштә немр шинҗллт кех эс гиҗ эмнлһ авх селвг өггдв, 5 күн таңһчин эмнлһнд эрүл-мендән батрулхмн. Района эмнлһнә һардвр болн селәдин эрүл-менд харлһна көдләчнр эн керг-үүлдвр дигтә-даратаһар давхин төлә, әмтн эрүл-мендин бәәдлән шинҗләд түрүн дөң авхин төлә аһу ик көдлмш күцәсиг темдглх кергтә. Селәнәхн эмчнр ирснд байрлад, эн керг-үүлдврт шунмһаһар орлцснь Хальмг Таңһчин Толһач Хаска Батун седвәриг әмтн дөңнҗ таасчахиг иткүлҗәнә. Ирх долан хонгт эмчнр Яшалтан, Үстин болн Сарпан райодт одхмн гиҗ зуралгдҗана. Эн сарин чилгч күртл эмчнрин баг таңһчин район болһнд күрхмн, - гиҗ Хальмг Таңһчин эрүл-менд харлһна министрин селвгч Батыра Зинаида хойр селәнд болсн керг-үүлдвриг ашлҗ келв.