Сән гисн эрдмч йилһгдх

Сегодня, 11:53 | Общество, Таңһчин зәңгс, Зіњг

Җил болһн таңһчин болн райодын багшнрин марһан болна. Тиигҗ багшнр эв-дован болн медрлән, билг- эрдмән үзүлҗ хамгин сән белдвртә мергҗлтнриг йилһҗ авна. Терүнлә дегц көдлмшч эрдмтә баһчудыг белддг мергҗлтнрин «Җилин урч» гидг марһан болна. Одахн Элстин болн райодын колледжмүдт уячин, тосхачин, гиигн маши ясачин, замчин эрдм дасхчадг мергҗлтнр таңһчин марһанд орлцхин төлә чидлән сөрв.
Одахн тер шүүврин дааврта марһан төгсв, терүнә йовудт 12 урч таңһчин сән гисн урч-багшин нер зүүхин төлә дөрлдх. Колледжмүдин 38 багшас 12 күн йилһән сән урчнр гиҗ йилһгдв. Эднә медрлнь, дамшлтнь, эв-довнь жюрид таасгдв, нам марһанд орлцсн цуг багшнр йоста эрдмчнр болҗана, гиҗ келҗ болхмн.
Ода орлцачнрин тускар онц келҗ болҗана гиҗ сангдна. Тер тоод Хахлына Тамаран нертә Хальмг медицинск колледжин багш Максим Кузыченко, Элстин хулд-гүүлгәнә – технологин колледжин һазадын келнә багш Болдра Эльвира, Лагань балһсна политехникин техникумин салг-үүлдврин кичәлин урч-багш Даметкен Хожаева, Элстин политехникин колледжин бачм бәәдл гетллһнә шишлң кичәлин багш Саңһҗин Эвелина, Хальмг медицинск колледжин багш Шоңхра Мария болн Элстин багшин колледжин англь келнә багш Опин Ольга хоорндан дөрлдх.
Таңһчин марһана өмн бидн Элстин политехникин колледжин багш Саңһҗин Эвелинала күүндвидн. «Мана марһан мөрн сарин чилгчәр-хөн сарин эклцәр болхмн. Бачм бәәдл гетллһнә кичәлд күн болһна әминь аврлһна эв-арһин туск медрл өгнәв. Тер мет обществознаня, ОБЗР-ин болн географин багш болҗ көдлҗәнәв», - гиҗ Эвелина Сергеевна келв. Эднә колледжин медлд эрдмиг түргн йовудтаһар даслһна болн нүүрлгч эв-арһин төв кесг җилин эргцд үүлдҗәнә. Энд эрдм шүүҗ авлһна кесг эв-арһ олзлҗ болхмн. Тер тоотыг баһ наста багшнр өргнәр олзлна, энд кичәлмүдән давулна, марһанд белдлһнд шин төв бас нөкд болна.
Политехникин колледжәс «Җилин урч» гидг марһанд ут турштан 3 багш орлцв. Түрүн дөрлдәнд эдн жюрин сурврмудт түргәр хәрү өгч, дәкәд амр биш төриг яһҗ хаһлхмб гиҗ ахр цагин болзгт цәәлһҗ багшин эв-дован үзүлв. Дарук өдртнь эдн бийиннь тускар «Би-урчв» гидг видеофильмд келҗ өгәд, марһанд орлцх седкл яһҗ үүдснә тускар цәәлһвр өгв. Цуг тер даалһвриг йилһән сәәнәр күцәһәд Саңһҗин Эвелина дииләч болв, ода эн таңһчин марһанд белдҗәнә, ах үүрмүдәсн селвг авч, теднә дөңгәр түшг кеҗ, теднә дамшлтас туста тоотынь авч нүүрләчнрин тоод орхар зуралҗана.
Давсн җилд эднә колледжәс автомеханикин урч-багш Алексей Андреев орлцла, бас марһана нүүрт һарла. Таңһчин марһана дииләчнр болхла Цугәрәсән марһанд орлцҗ талдан регионмудын колледжмүдин дамшлтла, шин эв-арһла таньлдна, Элстд ирҗ терүг үүрмүд дунд тархана.
Таңһчин дөрлдән амр болшго, энд бат авцан, агчмин зуур чик хәрү олҗ, чик шиидвр батлҗ, ил кичәл өгч сән белдврән үзүлх кергтә. Талдан колледжмүдин багшнрла таньлдҗ, теднлә дамшлтарн хувалцҗ, иньгллтин залһлда батрулҗ шин медрл хоршатн гиҗ дурдҗанавидн.
ТҮРВӘН Һуна

Видео