Крымск хавран тосад…

Сегодня, 12:25 | Общество, Таңһчин зәңгс, Зіњг

Моһа сарин 18 – Әрәсән тууҗд учрсн шин йовдлар ончрв. Арвн хойр җил хооран эн өдрлә Крым Республикин болн Севастополь балһсна иргнмүд референдумин ашар Әрәсән ханьд орхар шиидв. Эн җилмүдин туршарт Крым болн Севастополь шишлң көтлврин йовудт делгрәд йовна, гиҗ темдглх кергтә.
Арвн хойр җил нег агчм мет давсн болҗ медгднә. Эн цагин эргцд шин регионмудт чинртә хүврлтс учрв. Әрәсән ханьд орснас авн тенд экономик өргнәр делгрәд, социальн халхар чинртә керг-үүлдврмүд бас учрсн болдг. Тер мет олн-әмтиг негдүлҗәдг Крымск тагт, «Таврида» хаалһ, шин аэропорт тосхгдв. Терүнәс нань дунд сурһульмудт, бичкдүдин садмудт бат ясвр күцәгдҗ, дорас өсч йовдг үйнр сән кец-таалта бүрдәцст сурдг арһта болв. Эрүл-менд харлһна, сойлын, зуульчллһна болн нань чигн халхсар хүврлтс күцәгдснь ил үзгднә.
2014 җилин моһа сарин 16-д Крымин бәәрн улс референдумд орлцад, Әрәсән ханьд орх седклән медүлв. Моһа сарин 18-д болхла мана орн-нутгин Президент Владимир Путин Крым Республик болн Севастополь балһсн Әрәсән ханьд орҗахин туст шишлң бәрмт цаас батлв. Эн йовдл тууҗлгч чинртә болв.
Эндр Крым Республик болн Севастополь балһсн цаарандан делгрҗәнә. Севастополь балһсн Әрәсән Хар теңгсин флотын цергә-теңгсин улнь болна. Ода Крымин улс олна Диилврин төлә цергә шишлң керг-үүлдврт орлцачнрт буйнч седкләрн дөңгән илгәнә.
Эн тууҗлгч йовдл орс келн-улсин бат авциг цуг делкәд медүлсн болдг. Өдгә цагт болхла Крымин бәәрн улс олна эвин төлә төрскн нутган бас харсч йовна. Келхәс, Әрәсән орн-нутгин ханьд орсна дару, Крымин иргнмүд әәмшг уга таалд бәәдг болв.
Өцклдүр Әрәсән регионмудт, нег үлү мана таңһчд Крымск хаврин арвн хойрдгч җилд нерәдсн байрин керг-үүлдврмүд бүрдәгдв. Элст балһсна Диилврин паркд нег һазра мана улс олар ирҗ байрин концертд орлцв. Таңһчин баһчудын болн олна бүрдәцсин элчнр Манҗин Аркадин нертә Хальмг филармоня герин өмн Әрәсән туг делскв. Тер мет «Хамдан» баһчудын җисәнд орлцачнр билг-эрдмин марһа давулсмн. Луганск Улсин Республикин Антрацит балһсна баһ наста билгтнр терүнд орлцснь темдгтә болв. Сойлын бүрдәцст талдан олн зүсн керг-үүлдврмүд бас давулгдв.
Энүнә тускар даруһас тодрхаһар зәңглхвидн.

КАРСАНА Евгения

Видео