СВО-н ветеран оютнрла харһв

Сегодня, 14:53 | Общество, Таңһчин зәңгс, Зіњг

Крым Республик болн Севастополь балһсн Әрәсән ханьд орсна Өдрт нерәдәд, мана орн-нутгт «Крымас болн Севастополяс дуран медүләд» гидг керг-үүлдвр болв. Әрәсән булң болһнд эн чинртә керг-үүлдврин йовудт олн зүсн харһлтс, концертс, хургуд болв. Элстд эн өдр бас олн керг-үүлдвр бүрдәгдв.
Моһа сарин 18-д Т.Хахлынован нертә медицинск колледжд «Зарядка Героя» гидг керг-үүлдвр болв. Терүнд цергә шишлң керг-үүлдврин ветеран Элмаддин Залов оютнрла хамдан цогц-махмудан батрулв. Эн 2022 җилд эврә сән дурар цергә шишлң керг-үүлдврт орлцхар шиидв. Күсдундур җилдән залу-зөрмг кевәр дәәлдәд, шав авсна хөөн хәрҗ ирв. Элмаддин Элст балһсна 2-ч тойгта дунд сурһуль төгсәсмн, баһ цагасн авн спортар соньмсад, гиигн атлетикәр болн бөк бәрлдәнә халхар күцәмҗ бәрҗ йовсмн. Ода ветеран IT-компаньд көдлн бәәҗ Москва балһснд ик сурһульд сурчана.
- Эндрк харһлт оютнрт, спортар соньмсад цогц-махмудан батрулхд туслх гиҗ ицҗәнәв. Би баһ цагасн авн олн зүсн спортын марһаст орлцдг биләв. Келхд, цергә керг-үүлдврт орлцсн цагт спортын халхар хоршасн дамшлт керглгдв. Тенд бу-селм бий деерән зөөх кергтә, даалһвр күцәсн цагтан удан йовх кергтә бәәсмн, тегәд көл-һаран тинилһәд цогц-махмудан батрулх кергтә билә. Эндр эн харһлтд орлцсн оютнрт сурһулян сәәнәр сурад, төрскнч седкл зүүтн гисн селвг өгхәр седләв. Мана таңһч җил ирвәс батрад сәәхрәд йовна, мана баһчуд седвәртә, олна бәәдл-җирһлд шунмһаһар орлцна, эннь ик байр-бахмҗ үүдәнә, - гиҗ Элмаддин Залов келв.
«Волонтеры-медики» Әрәсән олна ниицәнә Хальмг Таңһчд үүлддг әңгин зүүцүләч Инесса Джоджинан келсәр, спортын халхар күцәмҗ бәрсн улсла иим харһлтс давуллһн сән авъяст тохрсн болхла, СВО-н ветеранла түрүн болҗ эдн тал ирв. Эндр 50 һар оютн ветеранла хамдан цогц-махмудан батрулв. Харһлтд колледжин бәәдл-җирһлд шунмһаһар орлцдг оютнр, «Движение первых» олна җисәнә гешүд орлцв. Эн керг-үүлдвр Әрәсән цуг регионмудар бүрдәгдв.
ДООҖАН Наталья
ЗУРГТ: СВО-н ветеран Элмаддин Залов оютнрла харһв

Видео