Оютнр билг-эрдмән үзүлв

Сегодня, 15:21 | Общество, Таңһчин зәңгс, Зіњг

Одахн Манҗин Аркадин нертә Хальмг филармоня бәәшңд Хальмг ик сурһулин үүдәгч студьсин байрин концерт болв. Оютнрин билг-эрдмиг таңһчд бәәтхә, орн-нутгин талдан регионмудт бас икәр таасна. «Бумбин орн» ансамблин болн Хальмг ик сурһулин талдан үүдәгч бүрдәцсин артистнр җил ирвәс мергҗлтән өөдлүлҗ, хальмг болн талдан олн келн- улсин ду-би үзүлҗ, мана сойлла болн билг-эрдмлә миңһәд әмтиг таньлдулна.
«Мана оютнр ховр билг-эрдмән үзүлсн деерән олна ик кергт шунмһа кевәр орлцна. Эдн концерт давулад цуглулсн мөңгән СВО-н дәәчнриг дөңнлһнә кергт йовулна. Тер мет Әрәсән улсин ниицлтин җил эклснә тускар Хальмг филармоньд болсн концерт иткүлв. Мана үүдәгч коллективс Әрәсән кесг келн-улсин ховр янзта сойлынь улм тодрхаһар үзүлхәр седнә. Мана оютнр олн зүсн марһаст билг-эрдмәрн олна оньг авлна. Нег үлү һазадын орн-нутгудас ирсн баһчудын билг-эрдмнь ик тааста болна. Эн керг-үүлдврт «Әрәсән олн улсин ассамблей» гидг бүрдәцин гешүд ирснь маднд байр үүдәв», - гиҗ Хальмг ик сурһулин һардач Салан Бадм цуг оютнрт ханлтан өргҗ, билг-эрдм кесг келн-улсиг хамцулна, мана ик орн-нутгин күчинь икдүлнә гиҗ заав.
Тер мет Әрәсән улсин ассамблейин Хальмг Таңһчд үүлддг әңгин ахлач Бембин Евгений концертин хөөн тоолврарн хувалцҗ иигҗ келв: «Оютнр лекцин хөөн студьд ирҗ билг-эрдмән делгрүлнә, эннь амр биш керг мөн. Болв тиим дамшлт угаһар эдн кесг регионд нерән дуудулҗ чадшго билә. «Бумбин орн» ансамбль Хальмг ик сурһулин бәәтхә цуг таңһчин ончта темдгнь болҗана, эднә билг-эрдм цаг ирвәс өсәд-өргҗәд йовна. Тегәд хойр частан болсн концерт агчмин зуур давсн болҗ медгдв».
Энүнлә хамдан концертд орлцсн корей улсин олна ниицәнә ахлач Улана Наталья оютнрин шунлтынь, чик авг-бәрцинь, билг-эрдминь темдглҗ, эднд күцәмҗ дурдв. Тер мет чечен улсин «Барт» («Хамцлт») сойлын негдлтин ахлач Умар Эльжуркаев болн утар-ногай улсин сойлын «Алабуга» төвин һардач Фатима Мархадаева баһ наста дуучнриг болн биичнриг магтҗ, «Бумбин орн» ансамблин концерт седкл авлсинь темдглв. Орн-нутгин болн мана таңһчин келн-улсин ниицлтд эдн туслҗана гив. Нег-негән медҗ, хоорндан хәрлцҗ иньгллтин залһлда батрулҗанавидн гиҗ эдн келв.
Хальмг ик сурһульд билгтә баһчуд баһ биш бәәхнь эн концерт бас нег иткүлв. Оютнр сурһулян сурсн деерән билг-эрдмән өргҗүлҗ, олн зүсн зевсгүдт наадад, келн-улсин сойл делгрүлҗ йовна. Энд сурчадг һазадын орна оютнр эн кергт бас ик тәвцән орулҗана. Әрәсән улсин ниицлтин җилән оютнр өргмҗтәһәр эклҗ, эн концертд хоршасн мөңгән СВО-д орлцҗадг хальмг дәәчнрт илгәхәр шиидв. Дәәчнрт кергтә өдгә цагин кергсл болн зер-зев фронтд йовулгдх болв. Дәәчнр эднд эрк биш ханлтан даңгин өргнә. Әрәсән улсин ниицлтин җилин йовудт тер дөңгин кемҗән өсәд-өргҗәд бәәхнь лавта. Келн-улсин иньгллт диилвр бәрхднь эрк биш туслх гиҗ сангдна.
ТҮРВӘН Һуна

Видео