Хаврин тәрәнә көдлмш эклҗәнә

Сүл җилмүдт Хальмг Таңһчин барун үзгин райодт буудян элвг урһц хурагдҗана. Өдгә цагт мана таңһчд 247, 7 миңһн гектар аһу һазрт намрин тәрән тәргдсн бәәнә. Тәрәнә ик зунь үвлин сармудт сәәнәр хадһлгдв. Эн җилин үвләр цасн орад, һазр чиг авад, сән урһц авлһнд туслҗана.
2025 җилд 182,7 миңһн гектар аһу һазр ясгдв, эн җил болхла ясгдсн һазрин кемҗән икдв. Селәнә эдл-ахун министр Гаван Тимурин темдглсәр, селәнә эдл-ахун халхар йилһгдҗәдг шаңһа мөңгнә кемҗән җил ирвәс икдәд йовна. Нег һазра селәнә эдл-ахун арһлачнр энүг олзлад, кергән делгрүлҗәнә.
«Селәнә эдл-ахун делгрлт» шаңһа көтлвр күцәлһнә йовудт 2026 җилд урһмл урһалһнд 115,2 сай арслң йилһгдхмн, буудя урһалһнд – 68 сай арслң, эк хулдҗ авлһнд – 34 сай арслң, боднцг болн талдан темс урһалһнд – 1,4 сай арслң мөңгн һарһгдхмн.
Терүнәс нань җил болһн тәрәнә бәәдл харшлдг олн зүсн хорхасла ноолда кедг кергсл бас белн бәәнә. Селәнә эдл-ахун эвдрсн техник ясгдад белдгдҗәнә.
Тәрә тәрлһнә көдлмш таңһчин Толһач Хаска Батун онц оньгт бәәнә гиҗ темдглх кергтә. Селвлцәнә йовудт шаңһас йилһдг демин болн онц зөвтә кредитин мөңгнә төрмүдт оньг тусхагдв. Тер мет фитосанитарн болн түүмрәс саглуллһна керг-үүлдврмүдин тускар күүндвр бас болв. Услврин бүрдәцин, буудян экин чинрин, тәрәнә һазрин болн талдан төрмүд хургт босхгдв. Нүүрләчнрин тоод ордг таңһчин эдл-ахусин һардачнр дамшлтарн хувалцв.
Тодлхас, 2024 җилд Яшалтан районд Карл Марксин нертә СПК-д буудя эд-бод кедг бүрдәц көдлмшән эклсн билә. Орн-нутгин Өмн үзгин дуһргт эн хамгин ик болна. Энд мана таңһчин бәәтхә хам-хоша бәәдг регионмудын селәнә эдл-ахун арһлачнр буудя эд-бод кеҗ, үүлдврән улм өргҗүлҗ чадҗана.
Хаврин цагт агротехническ цуг керг-үүлдврмүд давулхин төлә тосн-түлән бас зөөҗ орулгдв. Эн җилд таңһчин селәнә эдл-ахун көдләчнр хаврин тәрә тәрлһнә дааврта көдлмшән күцц кевәр болн цаг болзгтнь давулад, зунар урдк кевәрн элвг урһц хураҗ авхар зуралҗана.
ОЛЬДАН Цаһан