Суздалин сурһульчнрт хальмг туульс белглв

Хальмг Таңһчин Улсин Хуралын (Парламентин) Ахлач Артем Михайлов эн өдрмүдт Владимирск мүҗин Суздаль балһснд бәәнә. Тенд Артем Васильевич көдлмшч харһлтсин йовудт «Открытие» гидг дунд сурһульд одв.
Сурһуль-эрдмин бүрдәц эн җилд үүлдврән эклсмн. Терүг секлһнә байрин керг-үүлдврт ниигмин сүлҗәнә эв-арһар Әрәсән Президент Владимир Путин орлцсн билә. Шидр Әрәсән зака үүдәгчнрин Хүүвин социальн политикин төрмүдин комиссин гешүд шин сурһульд одв. Күндтә гиичнр өдгә цага некврлә ирлцдг сурһуль-эрдмин бүрдәцин үүлдврлә таньлдад, дегтрин саң, өөмдг бассейнә, спортын хорас, мастерскоймуд болн телестудь хәләв. Келхд, «Открытие» гидг сурһуль Суздаль балһснд ор һанцхн сурһуль-эрдмин бүрдәц болна. Хальмг Таңһчин Улсин Хуралын Ахлач сурһулин багшнриг йөрәһәд, сурһульчнрт хальмг туульс белглв.
- Әрәсән улсин ниицлтин җилд хальмг улсин туульс белглҗәнәв. Сурһульд дегтр ик чинр зүүнә, - гиҗ Артем Васильевич келв.
Әрәсән зака үүдәгчнрин Хүүвин споциальн политикин төрмүдин комиссин гешүд Суздаль балһснд тосхгдҗадг поликлиникин гер бас хәләв. Орн-нутгин регионмудас ирсн зака үүдәгч бүрдәцсин элчнр 2025 җилд комиссин үүлдврин аш дигләд, дорас өсч йовдг үйнр дунд чик авг-бәрц тархалһна төрәр өргн күүндвр тогтахмн.
БАТАН Наталья