Соньн һәәхүл-наадм бүрдәгдв

Сегодня, 16:01 | Общество, Таңһчин зәңгс, Зіњг

Урҗ өдр Элстд Өмн үзгин цергә дуһргин бүрдәсн «Иргчин эв-арһс: Төрскндән цергллһнә халхар БПЛА-н олзллһн» нертә һәәхүл-наадм бүрдәгдв. Өмн үзгин цергә дуһргин заллтын, йосна, сурһуль-эрдмин, олна бүрдәцсин элчнр болн оютнр Элст балһсна бичкдүдин билг-эрдмин Бәәшңд цуглрв. Мел оютнрин төлә эн керг-үүлдвр бүрдәгдв гиҗ келх кергтә.

Өдгә цагт БПЛА-г өргнәр олзлдг болв. Цергә халхар олзлсн деерән, тер мет селәнә эдл-ахун, хулд-гүүлгәнә, тосхлтын, хаалһин эдл-ахун болн талдан халхар бас олзлҗ болна.
Һәәхүл-наадмин йовудт баһчуд цергә шишлң керг-үүлдврин һазрт олзлсн хамг тоот үзҗ чадв. Тер мет «Дәәч» төвин дамшачнр шишлң кергсл олзлад, БПЛА-г яһҗ залдгиг зааҗ үзүлв. Арвтнр зөвәр соньмсҗахан медүлв, СВО-н ветеранмуд болхла цергә дамшлтын тускар бас келв.
Хальмг Таңһчд шаңһа ах инспектор Александр Беляев болн Хальмгин Толһачин һардврин ахлачин дарук Тарбан Савар керг-үүлдврин чинринь болн нег һазра баһчудт иим соньн һәәхүлд кергтә медрл өгсинь өөдәнәр үнлсн болдг.
– Дорас өсч йовдг баһчудыг өдгә цагин некврин тускар медүлҗ, цергә болн эвин таалд БПЛА олзллһна тускар медрл өглһн мана керг-үүлдврин һол күслнь болна. Эндрк оютнр удл уга сурһулян төгсәһәд, Төрскән харсхар йовх, тегәд эдниг урдаснь белдх кергтә. Темдглхд, арвтнр компьютерт олн зүсн нааддын даалһврмудыг сәәнәр күцәв. Тегәд өдгә цагин некврлә ирлцдг көлгиг амр кевәр залҗ чадхмн. Олн зүсн дронмуд олзлад, кесг миңһн дууна һазрт ямр чигн кергиг күцәҗ болна, – Өмн үзгин цергә дуһргин заллтын элч, майор Евгений Снитко темдглв.
Һәәхүл-наадмд орлцсн Б.Б.Городовиковин нертә Хальмг ик сурһулин оютн Муҗан Эңкрин келсәр, ирлцңгү керг-үүлдвр энүг соньмсулв. Олн талвңгудт үзүлсн соньн тоотын тускар эн медҗ авв. Иргчдән шүүҗ авсн эрдмәрн көдләд, өдгә цагин эв-арһсиг эрк биш олзлхан медүлв.
СВО-н йовудт хортна техник бас олнд үзүлгдв. Көвүд энүг оньган өгч хәләһәд, цергә мергҗлтнрт соньмсулҗадг сурврмудан өгв. Тер мет һаза БПЛА-г яһҗ нискәҗ залдгиг эдн бас үзв.
Темдглхд, Элст чинртә һәәхүл-наадм бүрдәгдсн, арвдгч балһсн болв. Бүкл сара хонгт Өмн үзгин цергә дуһргин заллтын элчнр Майкоп, Краснодар, Анапа, Сарпуль, Аһш, Әәдрхн болн талдан балһсдар йовад, баһчудыг соньн тоотла таньлдулҗана.
КАРСАНА Евгения

Видео