Шаңһа залврин көтлврмүдт орлцачнр харһв

Сегодня, 16:02 | Общество, Таңһчин зәңгс, Зіњг

Эн өдрмүдт РАНХиГС-ин Президентск академин шаңһа залврин ик сурһулин көтлврт орлцачнр мана таңһчд ирсн бәәнә. Орн-нутгин регионмудын күцәгч болн зака үүдәгч бүрдәцсин, ик компаньсин элчнр, «Әрәсән нүүрләчнр» болн «Босхмҗин нүүрләчнр» марһасин дииләчнр регионд дамшлт хоршалһна йовудт мана таңһчин социальн-экономическ бәәдлиг шинҗләд, кесг харһлтст орлцҗана. Нег тиим харһлт шидр Б.Б.Городовиковин нертә Хальмг ик сурһульд болв. Терүнд гиичнр «Баатрмуд 08» сурһулин көтлврт орлцҗадг цергә шишлң керг-үүлдврин ветеранмудла харһад, чинртә төрмүдәр күүндәд, ухан-тоолврарн хувалцв.
Харһлтыг Хальмг ик сурһулин һардач Салан Бадм нүр үгәр секәд, орн-нутгин делгрлтин йовудт олзта-тустаһар үүлдхәр шунҗадг хойр көтлврт орлцачнр арһ-чидлән хамцулад, нөкцлтиг батрулхд эндрк харһлт эрк биш туслх гиҗ темдглв. Бадм Катинович ик сурһулин эндрк өдрин үүлдврин, номтнрин болн оютнрин күцәмҗин, һазадын орн-нутгудла нөкцлт делгрүллһнә, олн улсин ниицлт батруллһна халхар күцәгдҗәдг көдлмшин тускар ахрар келҗ өгв. Эндр мана ик сурһульд Әрәсән 37 региона, һазадын 53 орн-нутгин оютнр сурчана, орс кел даслһна халхар 7 төв үүлдҗәнә, удл уга Вьетнамд дәкәд нег төв секгдх болв. Бичкдүдин ик сурһульд 320 күүкн-көвүн сурчана, эдн дөнтәһәсн авн гүн медрл авад, хөөннь энд тааста эрдм дасад, номин халхар күцәмҗтәһәр үүлдхин төлә цуг таал тогтагдв. Мана ик сурһуль таңһчин улгч вуз болҗ, «Приоритет 2030» көтлврт орлцҗана. Энд сурһулян сәәнәр сурдг, олна бәәдл-җирһлд орлцдг седвәртә, номин болн спортын халхар күцәмҗ бәрдг оютнриг дөңнҗ мөрәлнә. Өрк-бүлән өндәлһсн баһчудт онц килмҗ тусхана, ода 397 «ач-зе» маднд бәәнә, гиҗ ик сурһулин һардач бахтҗ келв.
Шаңһа залврин ик сурһулин көтлврин һардач Алексей Куртов мана таңһчд дамшлт хоршалһна өдрмүд тустаһар давҗахиг, эн өдрмүдт олн зүсн керг-үүлдврмүд, соньн харһлтс бүрдәгдҗәхиг темдглв. Цергә шишлң керг-үүлдврт орлцачнр сурһулин көтлврин йовудт медрл хоршаҗ авад, өөрхн иргчдән төрскн һазриннь делгрлтд ач-тусан күргхиг эн үнлв. Шаңһа залврин халхар көдлхин төлә гүн медрл, дамшлт кергтә, тегәд эн харһлтын йовудт ухан-тоолврарн хувалцҗ, ямр нег төрәр сүв-селвгән өгч, нег-негндән дөң болхмн гив.
Хальмг ик сурһулин һардачин дарук Конин Оксана «Баатрмуд 08» көтлврин һол күслмүдин тускар ахрар келәд, шидр сурһулин дарани девсң эклснә тускар зәңглв. Сурһулин көтлврт орлцҗадг цергчнр залу-зөрмгән үзүләд, цергә даалһвран үнн-чик седклтәһәр күцәһәд, өөдәнәр ачлгдсмн. СВО-н ветеранмуд иргчдән таңһчин муниципальн, күцәгч йосна бүрдәцст көдлхмн. Келхд, сурһулин көтлврт орлцҗадг хойр күн ода Хальмг ик сурһульд көдлҗәнә, эдн баһчудт төрскнч сурһмҗ өглһнә, цергә эв-арһ даслһна халхар багшлҗана.
Харһлтд орлцсн Рязанск мүҗин губернаторин һардврин һардачин дарук Яна Стрельцова эврә һазртан «Баатрмуд 62» көтлвриг зална, тегәд эн цергә шишлң керг-үүлдврт орлцачнрин сурһулин көтлвр күцәлһнә туст хоршасн дамшлтарн хувалцв. Эднә региона көтлврт орлцачнр сурһуль-эрдмин, бичкдүдин болн баһчудын бүрдәцсин һардачнрар көдлҗәнә. Иим улсин дунд цергә шишлң керг-үүлдврин ветеран Андрей Капустин бәәхиг цуһар байртаһар тосв. Эднә өрк-бүлин тавн үйин элчнр, тер тоод күүкд улс цергә халхар үүлдҗәнә. Луганск Улсин Республикәс ирсн Ксения Габович, «Әрәсән нүүрләчнр» марһана дииләч Алексей Хижняк, ВШГУ-н залврин кадрмуд белдлһнә орн-нутгин төвин менеджер Василий Архипов регионд дамшлт хоршалһна тускар келәд, баһчудт төрскнч сурһмҗ өглһнә, тууҗиг үнн кевәр хадһллһна төрмүдәр селвгән өгв. СВО-н ветеранмуд Нахошкинә Мингиян, Орһан Арслң, Увшан Виктор, Манҗин Дмитрий күүндврт шунмһаһар орлцҗ, сурһулин көтлвр олзта-туста болхин төлә ямаран эв-арһс олзлҗ болхин тускар сурв. Харһлтд орлцачнр сурһулин хойр көтлврт орлцачнрин ниицә бүрдәҗ, хамцу үүлдҗ нег-негндән дөң-нөкд болхар шиидв.
ДООҖАН Наталья
ЗУРГТ: харһлтд орлцачнр

Видео