Дегтрин саң-олна үүлдврин төв

Давсн долан хонгин басң өдрлә «Негдсн Әрәсә» партин дөңнлтин штабд олна хург болв. Энд Өмн үзгин шаңһа дуһргт Әрәсән «Медрл» ниицәнә үүлдвриг өргҗүллһнә заллтын ахлач Александр Шматькола соньн күүндвр болв. Элстин болн райодын, селәдин, сурһульмудын дегтрин саңгудын һардачнр энүнд орлцв. Әрәсән «Медрл» ниицәнә Хальмг Таңһчин әңгин толһач Манҗин Элеонора харһлтыг нүр үгәр секв.

- Эндрк мана харһлтд бидн «Умшачин көтлврмүд» гидг шин төсвин тускар күүндвр кехвидн. Әрәсән гегән-герлин министерств орн-нутгин «Медрл» ниицәнлә хамдан Әрәсән Президентин зааврар эн төсвиг үүдәв. Бичкдүд болн арвтнр ода баһар умшна, зәрмнь болхла төрүц умшхш, тадн, сурһулин дегтрин саңгин көдләчнр, терүг сәәнәр меднәт. Тегәд эн «Умшачин көтлврмүд» төсв урн үгин үүдәврмүд умшлһнд күүкдиг улм икәр орлцулх күсл тәвҗәнә, тиим кевәр эдн орс болн хальмг бичәчнрин үүдәврмүдиг нертә артистнр, сойлын болн сурһуль-эрдмин көдләчнр яһҗ умшҗахинь соңсад, орс болн төрскн келән улм сәәнәр медҗ авх. Әрәсән Президент Владимир Путин тиим төр тәвҗәнә. Эн төсвин тускар бидн эндр улм тодрхаһар күүндхвидн, - гиҗ Элеонора Сангаджиевна цәәлһв.
Ниицәнә әңг Хальмг Таңһчд һурвн җилдән көдлҗәнә. Регион болһнд тиим әңгүд бәәнә. Хальмг әңг олн зүсн төсв күцәҗәнә. Элстин болн райодын сурһульмудт кесг төрәр лекцс умшгдна, сурһульмудын һардачнр болн багшнр бас лектормуд болҗ үүлдҗәнә.
«Умшачин көтлврмүд» гисн төсв ода цуг орн-нутгар эклҗәнә. Яһад эн тиигҗ нерәдгдҗәнә гихлә, нертә бичәчнрин үүдәврмүдиг артистнр эс гиҗ төрскн келнә багшнр умшҗ өгх. Тер төсвиг тохрахин төлә «Умшачнрин клубмуд» кергтә болх, тедниг бүрдәлһнә тускар ирсн гиичнр тодрхаһар келҗ өгв.
«Тиим үүлдвр маднд ик туста болх гиҗ санҗанав. Сурһуль-эрдмин шаңһа политикиг тохралһна кемд дегтрин саңгин көдләчин чинр өөдлнә. – Мана региона онц тоотынь оньгтан авч немр седвәр татх керг учрҗана. Бидн эндр бичкдүдин төлә бичдг түүрвәчнрлә чигн таньлдҗ теднәс селвг авч чадҗанавидн. Эн төсв күцәлһнә төлә мана таңһчиг шүүҗ авсндтн ик ханлтан өргҗәнәв. Дегтрин саңгин көдләчнрт күцәмҗ дурдҗанав»,- гиҗ таңһчин сурһуль-эрдмин министрин дарук Мацга Эльза темдглв.
Цааранднь эн күүндврт Өмн үзгин шаңһа дуһргт Әрәсән «Медрл» ниицәнә үүлдвриг өргҗүллһнә заллтын ахлач Александр Шматько орлцҗ тоолвран медүлв. Хамгин түрүнд дорас өсч йовдг үйнрт чик сурһмҗ өгч, дегтр умшлһна керг эдниг соньмсулх зөвтә гиҗ эн темдглв. Гегән-герлин көтлвриг өргҗүлхин төлә саңгудт бәәдг көрңгиг өргнәр олзлҗ, урн үгин үүдәврмүдиг умшлһнд арвтнриг улм икәр орлцулҗ болҗана. Тиим седвәртәһәр Хальмг Таңһчд «Умшачнрин клубмуд» гидг төсв күцәгдх. Таңһчин сурһульмудт болн колледжмүдт утх-зокъялын негдлтс экләд бүрдәгдҗәнә. Хамгин шунлтта клубмудт сар болһн бичәчнрлә, артистнрлә болн театрин үүлдәчнрлә харһлтс кех таал тогтагдх гиҗ күндтә гиич келв.
Сойлын нертә үүлдәчнрлә чигн харһлтс бүрдәлһнд таңһчд үүлддг ниицән дөңгән күргҗ чадх. СВО-д орлцҗадг баатрмудын зөргтә йовдлын тускар келврмүд, фильмс сурһульчнрин оньгт тусхадх.
Дегтрин саңгудт лекторий чигн бүрдәҗ, соньн олн зүсн төрәр күүндвр кеҗ болҗана. Тер тоод экономикин болн бизнесин, тооһин эв-арһсин болн әмтиг, баһчудыг соньмсулҗадг кесг төрәр номтнр болн шинҗләчнр лекцс умшх. Финансин медрл авлһна, таңһчин болн орн-нутгин тууҗиг даслһна халхар шинҗләчнр сурһулин, вузин, колледжин баһчудт тодрхаһар келҗ өгх. Зуг тана седвәр кергтә. Таңһчин ниицән таднд ямр чигн төрәр нөкд болад бәәх. Шаңһа лектормудыг чигн дуудҗ болҗана гиҗ Алескандр Шматько селвглв.
Цааранднь Элст балһсна толһачин дарук, ниицәнә лектор Дмитрий Довгополов үг авв: «Таңһчин «Баатрмуд-08» көтлврт орлцачнр, СВО-н ветеранмуд «Умшачин клубин» кичәлд эс гиҗ лекторийд орлцҗ чадҗана. Мана балһсна саңгуд ямр чигн күүндвр кеҗ чадҗана, терүнә төлә өдгә цагин кергсл болн талдан чигн таал бәәнә гиҗ Дмитрий Сергеевич темдглв. Би эврән лекторийд орлцхар бәәнәв. Тиим кевәр дегтрин саңгуд әмтнд медрл өглһнә шин талвңгудт хүврҗ болхмн. Улм икәр әмтн тана тал ирәд бәәх, умшачнрин то чигн икдх».
Тер мет «Калмыкия» РИА-н һардач болн Элст балһсна Хургин депутат Марила Хоңһр күүндврт бас орлцҗ дегтрин саңгудын көдләчнр седвәртәһәр үүлдхлә, тернь цуг улст, олна җисәнд туста болх гив. Арвтнрт чик сурһмҗ өгх кергтә, һоллгч учр-утхинь цәәлһхмн. Эс гиҗ өөрхн иргчд мана күүкд бөдүн улсин келсиг медшго гиҗ Хоңһр Анатольевич темдглв. РИА-н талвңд утх-зокъялын хора бүрдәлһнә седвәриг һардач бас дөңнв.
Сурһуль болһнд утх-зокъялын клуб тогтаҗ болҗана. Тенд күүкд бичәчнрин дегтрмүд умшҗ, теднә учр-утхин тускар тоолврарн хувалцҗ чадх. Эврән чигн юм бичдгиг дасх. Эднә һардачнь болҗ багш эс гиҗ дегтрин саңгин көдләч үүлдҗ чадҗана.
Эн харһлтд Ростовас ирсн бичәч Жанна Андриевская бас орлцв. Күн болһн ямр келн-улсин элч болҗахан, ямр һазрт, ямр орн-нутгт бәәхән, эврә келн-улсин тууҗан медх зөвтә гиҗ бичәч болн номт тоолҗана. «Өврмҗтә Әрәсә» болн «Өврмҗтә Әрәсә - бичкдүдт» гидг дегтрмүдин хураңһун түүрвәч эн болҗана. Хальмг Таңһчин «Умшачнрин клубмудт «Җаңһр» алдр дуулврин болн терүнә баатрмудын тускар келх кергтә. Тиим кевәр сурһульчнр эврә тууҗин болн авъясин тускар улм сәәнәр медх, тернь төрскнч сурһмҗд туслх гиҗ бичәч заав.
Цааранднь «Феникс» барин һарһачин көдләч Светлана Плотникова регионмудын сурһульмудла болн дегтрин саңгудла яһҗ нөкцлтҗәхин тускар келҗ өгв. «Седвәртәһәр болн үүдәгч кевәр көдлхлә, шин көтлврин ашнь йир сән болх, эн кергт таднд «Медрл» ниицәнә болн министерствин көдләчнр болн шинҗләчнр дөңгән күргх. Бидн бас теднә нилчәр тиим керг-үүлдвр бүрдәнәвидн. Эн төсв күцәлһнд олн улс орлцх гиҗ күндтә гиич иткүлв.
Тиигҗ эн туста күүндвр төгсв, цаг ирвәс олна күчәр сурһульмудт, селәдт, райодт умшачнрин клубмуд бүрдәгдҗ, бичкдүдин болн арвтнрин, цуг улсин чигн орс болн хальмг келнә, талдан чигн халхин медрлинь гүүдүлҗ болх гиҗ лавтаһар келҗ болҗана.
ТҮРВӘН Һуна