Эрмдгтә баһчудт нөкд болхар

Хальмг Таңһчин әмтиг көдлмшәр тетклһнә Төв таңһчин социальн делгрлтин, күч-көлснә болн көдлмшәр тетклһнә министерствин дөңгәр «Абилимпикс» таңһчин марһана йовудт гемтә-шалтгта баһчудын төлә көдлмшч ормсин яарм давулв. Эн керг-үүлдвр сән авъяст тохрв гиҗ келҗ болҗана, юңгад гихлә эн йисн җилин эргцд бүрдәгдҗәнә. Х.Кануковин нертә багшнрин колледжин улд болсн керг-үүлдврт таңһчин дунд шишлң сурһуль-эрдмин бүрдәцсиг эн җил төгсәҗәдг оютнр орлцв. Багшнрин колледжин һардач Җамбинә Татьяна керг-үүлдвриг секәд, эн яарм таңһчин бүрдәцсин элчнрт болн эн җил сурһулян төгсәҗәдг баһчудт туслхиг темдглв. «Мадн хоорнд күүнә улс уга, бидн цуһар ахнр-дүүнр болнавидн» гисн дуудвртаһар эн җил яармиг давулҗанавидн гиҗ Татьяна Николаевна зәңглв.
Таңһчин әмтиг көдлмшәр тетклһнә Төвин һардачин дарук Сумьяна Беллан келсәр, эн керг-үүлдвр гемтә-шалтгта баһчудт тааста эрдмәрн көдлмш олҗ авхд дөң-нөкд болхин төлә бүрдәгднә. Таңһчин 9 бүрдәцд 32 көдлмшч орм белдснәннь тускар келәд, баһчудыг соньмсулҗадг сурврмудт цәәлһвр өгв. Күүкд-көвүд таңһчин бүрдәцсин элчнрлә харһад күүндәд, күч-көлснә хаалһан эклх баһчудын туст ямаран неквр бәәхин, көдлмшин таалын тускар сурв. Келхд, 18-әс авн 25 нас күртл эрмдгтә баһчуд җалв авсн деерән хойр сарин эргцд әмтиг көдлмшәр тетклһнә цергллтәс демин мөңг авна. Гемтә-шалтгта улсиг көдлмшт авсн бүрдәц җалвд һарһсн мөңгән даңцалһад шаңһас дем авна, гиҗ Белла Леонидовна цәәлһв.
Көдлмшч ормсин яармд «Водоканал», «Интерстрой» бүрдәцсин, хотл балһсна 23-ч тойгта дунд сурһулин, Орс Келн-улсин гимназин, Келн-улсин оркестрин, таңһчин әмтнә социальн теткврин төвин, 18-ч, 28-ч болн 31-ч тойгудта бичкдүдин садмудын элчнр орлцв. Эдн ямаран эрдмтә мергҗлтнр кергтә болҗахиг цәәлһәд, баһчудыг соньмсулҗадг сурврмудт хәрү өгч, эднә бүрдәцст күч-көлснә хаалһан эклхин туст үрвр кев. «Водоканал» бүрдәцин көдләч Нахашкинә Оксана нефтин болн газин колледжин оютнрла күүндәд, һаңначнр, слесарьмүд эднд кергтә болҗахиг зәңглв. Келхд, һаңначин җалвнь 27-50 миңһн арслң тогтана. Балһсна 28-ч тойгта бичкдүдин садт ода сурһмҗлачнр, терүнә нөкднр, медицинск эгч кергтә. Сурһулин бүрдәцин элч Үлмҗин Татьянан келсәр, ода орн-нутгин болн таңһчин һардвр баһ наста мергҗлтнриг урмдулҗ олн зүсн демин мөңг өгнә. Тиигәд, баахн сурһмҗлачд җалв деернь сар болһн немр 5 болн 7 миңһн арслңга дем һарһҗ өгнә, күч-көлснә хаалһан эклҗәдг баһчудт нег дәкҗ 150 миңһн арслң өгч дөңннә. Харм төрхд, сурһулян төгсәсн баһчуд сурһмҗлачин көдлмшт орхар седхш.
Нефтин болн газин колледжин багшнр Җалсана Майя болн Обгенә Ирина көдлмшч ормсин яармд оютнран дахулҗ ирв. Эдн дунд һаңначин, уячин болн эргндк һазр ахулдг мергҗлтин эрдм дасчадг баһчуд билә, тегәд эдн таңһчин әмтнә социальн теткврин төвин элчнрлә күүндәд, медәтнрлә олн зүсн керг-үүлдвр давуллһна көдлмшәр соньмсв. Уячин эрдм дасчадг Таптыра Өлзәт эн яармд ирсндән байрта бәәхән медүләд, эрмдгтә баһчудт көдлмш олҗ авхд дөң күргҗ иим керг-үүлдвр бүрдәснд ханлтан өргв. Күүкнә келсәр, таңһчин әмтнә социальн теткврин төвд үүл бәрҗ цаган тустаһар давуллһна көдлмш энүг соньмсулв.

ДООҖАН Наталья
ЗУРГТ: көдлмшч ормсин яарм болҗах кем