Суңһачнртан тооцаһан өгв

Хальмг Таңһчин Толһач Хаска Батун седвәрәр таңһчин Улсин Хуралын (Парламентин) депутатнр кеҗ-күцәсн көдлмшән ашлад, суңһачнрлаһан харһҗ тооцаһан өгх зөвтә. Депутатнр әмтн өгсн даалһвриг күцәһәд ил кевәр көдлмшән давулхин төлә иим харһлтс бүрдәгднә. Эн өдрмүдт таңһчин Улсин Хуралын депутатнр 2025 җилд кесн көдлмшән ашлад, әмтнлә харһҗана.

Шидр депутат Хаалһин Очр Элст балһсна 20-ч тойгта дунд сурһулин улд суңһачнртаһан харһв. Терүнд депутат давсн җилин эргцд ямаран төрмүд хаһлгдсна, ямаран керг—үүлдврмүдт орлцсна тускар тодрхаһар келҗ өгв. Очр Владимирович хазна, алвна, өлг-эдин, экономикин политикин болн арһлачнрин төрмүдәр үүлддг хүүвиг һардна. Энүнә келсәр, давсн җилд болсн 8 сүүрт 28 төр хәләгдв, тер тоод Хальмг Таңһчин закадын 17 төсвин туст күүндвр болв. Балһсна 2-ч болн 6-ч микрорайодт бәәдг әмтн депутатла харһад, эдниг үүмүлҗәдг төрмүд хаһлхд дөң-нөкд болхиг сурв. 2024 җилд 2-ч микрорайона 35-ч тойгта болн 6-ч микрорайона 5-ч тойгта гермүдин өөр шидр бичкдүдин төлә футболын стадионмуд тосхгдсн билә. Хаалһин Очр «Десантникүдин ниицән» гидг олна бүрдәциг һардна, тегәд энүнә гешүд спортд оньган тусхаҗ, сул цаган тустаһар давулхд бичкдүдт дөң-тусан күргнә. Тер мет олна бүрдәцин дөңгәр балһсна 6-ч микрорайона 7-9-ч болн 12-ч тойгудта гермүдин өөр бичкдүд нааддг талвң тосхгдв. Балһсна 2-ч микрорайона 36-ч тойгта гериг шинәс оралв, 24-ч тойгта бичкдүдин садт бат ясврин көдлмш дигтә-даратаһар болн сән чинртәһәр кегдсиг депутат бүрткв.
Дорас өсч йовдг баһ үйнрт төрскнч сурһмҗ өглһнд, тедн дунд чик авг-бәрц тархалһнд депутат онц оньг тусхана. «Комбат» гидг цергә-спортын төрскнч сурһмҗин клубин гешүдлә бат залһлда бәрҗ Хаалһин Очр күүкд-көвүдт олн зүсн марһаст орлцхд демән күргнә. Тиигәд, депутат сар болһн 30 миңһн арслң йилһҗ, баһчудыг дөңннә. Мана таңһчд үүлддг «Төрскән харсачнр» шаңһа саңгин әңгиг һардад, Очр Владимирович цергә шишлң керг-үүлдврт орлцачнрт болн теднә өрк-бүлмүдин гешүдт бас дөңгән күргҗ, төрмүдтнь орлцна. Таңһчин һардврла хамдан СВО-н ветеранмуд дунд нидн спартакиад түрүн болҗ бүрдәгдв. Андрей Кунаковин санлд нерәдҗ регионмуд хоорндк параспартакиад давулгдв. Давсн җилд цергә даалһвран күцәҗ йовад, әмнәсн хаһцсн нег һазра улсин экнрлә болн белвсн күүкд улсла харһв. Цергә шишлң керг-үүлдврт орлцачнрт Элстд өндртән 50 метр Әрәсән туг делскх седвәр татв, тегәд депутат тедниг дөңнҗ байрин керг-үүлдврт орлцсмн. 2025 җилд мана орн-нутгт Алдр Диилврин 80 җилин өөн өргнәр темдглгдсн билә, тер тоод мана таңһчд кесг керг-үүлдвр болв. Хаалһин Очр Советин Союзин Баатр Делгә Эрднин медаль цергә шишлң керг-үүлдврт орлцачнрт бәрүлҗ өглһнд, Төрскән харсгч Алдр дәәнд диилвр бәрсн хальмг улсин туурмҗин туск сүүрмүдт, һәәхүлд бас орлцсмн.
Сән авъяст тохрсар, депутат «Бичкдүдиг сурһульднь белдхмн», «Күслин һацур» гидг буйнч седклин керг-үүлдврмүдт орлцҗ, баһ тетквртә, олн үртә өрк-бүлмүдт дөңгән күргнә. Нидн Хальмг ик сурһуль төгсәҗәдг СВО-д орлцачнрин 15 үрдт депутат эврәннь нерн деерәс мөрәс бәрүлҗ өгснь темдгтә болв.
Суңһачнрла болсн харһлт үр-иньгин таалд давв. Хаалһин Очр бийнь цергә керг-үүлдврт орлцсмн, энүнә өрчинь олн ачлвр кеерүлнә, тегәд ветеранмудыг, СВО-д орлцачнриг болн теднә өрк-бүлмүдиг үүмүлҗәдг төрмүд энүнд өөрхн болна. Әмтн депутатын кесн көдлмшин тооцаг үнләд, цааранднь чигн нег һазра улсин сә хәәҗ күцәмҗтәһәр үүлдхиг дурдв. Иим харһлтс көдлмшән ясрулҗ суңһачнрин итклиг даавртаһар күцәхд урмд өгнә гиҗ депутат темдглв.
ДООҖАН Наталья