Садв гем гетллһнә туст

Сегодня, 17:06 | Общество, Таңһчин зәңгс, Зіњг

Җил болһн моһа сарин 24-д цуг нарт-делкәд садв гемәс хөрлһнә Өдр темдглнә. Эрүл-менд харлһна нарт-делкән бүрдәцин болн садв гемәс хөрлһнә ниицәнә седвәрәр эн өдриг 1982 җиләс авн темдглдг болсмн. Эн җил мана орн-нутгт долан хонгин туршарт әәмшгтә гемәс хөрлһнә керг-үүлдврмүд давулгдҗана. Сән авъяст тохрсар мана таңһчд бас «Цаһан камб цецг» гидг кергин йовудт балһсна төв талвңд мобильн флюорограф көдлнә, тегәд энд әмтн шинҗллт кеҗ чадна.
Садв гемәс хөрлһнә таңһчин эмнлһнә ах эмч Дорҗин Павелин келсәр, сүл җилмүдт эн әәмшгтә гемин туст бәәдл ясрв. Мана орн-нутгт, тер тоод мана таңһчд, эн гемәс саглуллһна көдлмшиг олн җилин эргцд дигтә-даратаһар давулҗадг төләд гемтә улсин то баһрҗана. Эрүл-менд харлһна бүрдәцсин көдләчнр диспансеризацин болн «Эрүл-менд бәәтн!» гидг керг-үүлдврмүдин йовудт флюорографин шинҗллт кехин тускар тодлулна. Райодын эмнлһст фтизиатрическ цергллт бас эн гемәс хөрлһнә туст аһу ик көдлмш күцәнә, - гиҗ Дорҗин Павел темдглв.
Хотл балһсна төвд мобильн флюорограф көдлҗәхинь соңсад, әмтн шинҗллт кехәр адһв. Элстд бәәдг медәтнр Шугран Җирһл болн Онкудан Владимир бас иигәрән ирснь үзгдв. «Садв гемәс хөрлһнә Өдрлә иим керг-үүлдвр җил болһн давулгдна. Һаза цевр аһар кииләд, дарунь шинҗллт кеҗ болхнь таасгдна тегәд эрк биш шинҗллт кех кергтә гиҗ тоолҗанавидн. Эндр нарта дулан өдр, тегәд әмтнлә күүндәд, цаган тустаһар давулҗанавидн. Күн болһн эврәннь эрүл-мендин бәәдлин тускар ухалад, дааврта болх зөвтә, җил болһн флюорографин шинҗллт кех кергтә. Санаторьт эс гиҗ эмнлһнд одхла эмчнр ирлцңгү цаас сурна», - гиҗ медәтнр келв.
Эн өдр «Сулда» төвин олн зүсн гемәс саглуллһна әңгин көдләчнр әмтнлә күүндәд, чик авг-бәрцин туст сүв-селвг өгв. Эдн цусна дарлт шинҗләд, тәмк татхмн биш, цогц-махмудан батрулад, бульчңган чаңһаһад, йовһар йовад чигн бийән арднь орҗ хәләх кергтә гиҗ әмтнлә давулсн күүндврт темдглгдв.
БАТАН Сәәхлә

Видео