Һолын көвә цеврлв

Шидр Хальмг Таңһчин йиртмҗин көрңгин болн эргндк бәәдл харлһна министерствин көдләчнр Элистинка һолын көвәһәр хог-бог ахулв.
Усна көрңгин нарт-делкән өдр угтад, министерствин мергҗлтнр «Калмкаспвод» бүрдәцин элчнрлә хамдан «Әрәсән усн» орн-нутгин керг-үүлдврт орлцв. Һолмудын болн нуурмудын көвәг цеврләд, бәәрн әмтн эргндк бәәдлиг әрүнәр хадһлтха гисн күсл тәвгдҗәнә.
Керг-үүлдврт орлцачнр Элистинка һолын көвәд үвлин цагт хурсн хог-богиг цуглулв. Таңһчин йиртмҗин көрңгин болн эргндк бәәдл харлһна министерствин әңгин һардач Цернә Баатрин келсәр, һолмудт цевр бәәдл тогталһн мана олна керг болна. Тер мет «Әрәсән усн» Цугәрәсән керг-үүлдвр төрскн һазр-усндан хару улсиг хамцулна гиҗ темдглв.
Тегәд эврә һазртан цевр-цер бәәдл тогтаһад, нег үлү усна тогталмудыг хадһллһна кергт оньган тусхатн гиҗ, нег һазра улстан ирлцңгү үрвр кегдв.
ОЛЬДАН Цаһан