Шунлтта баһчуд дөрлдҗәнә

Сегодня, 16:45 | Общество, Таңһчин зәңгс, Зіњг

Эн өдрмүдт җил болһн болдг «Абилимпикс» таңһчин марһан Элстин политехникин колледжд эклв. Энд цуглрсн марһанд орлцачнриг болн шинҗләчнриг таңһчин сурһуль-эрдмин болн номин министерствин ахлгч мергҗлт Кермн Муева йөрәҗ күцәмҗ дурдв.

- 2018 җиләс авн «Абилимпикс» марһан экләд бүрдәгдҗәнә, кесг җилин эргцд политехникин колледж эн керг-үүлдврин бүрдәһәч болҗ үүлдҗәлә, ода тер даалһвриг Элстин багшин колледж күцәҗәнә. Түрүн җилмүдт 10 әңг бәәсн болхла, ода 20 һар әңгд күрв, теднә тоод һоллгч 17 әңгд баһчуд болн мергҗлтнр дөрлднә, - гиҗ Кермн Викторовна келв. – Давсн җилд болхла электромонтажин әңгд СВО-н ветеранмуд эврә арһ-чидлән сөрв. Эн җил эдн шинәс дөрлдҗәнә, тер мет эдн дуучнрин болн шалтгта улсин дунд әңгд нүүрлгч орм эзлхәр зүткчәнә. Давсн җиләс авн арһлачнрин марһанд Хальмг ик сурһулин бакалавриатын оютнр орлцдг болв. Бичкдүдин садын күүкд-көвүд чигн «Абилимпикс» марһанд орлцҗана, эднә дөрлдән Элстин 4-ч тойгта садт болна, тер мет эрмдгтә бичкдүдин сурһулин арвтнр политехникин колледжин талвңд чидлән сөрҗәнә, цуг орлцачнрин төлә бидн сән таал тогтаҗанавидн, эдниг ирснд цань уга байрта-бахта бәәнәвидн.
Цааранднь шинҗләчнр болн теднә әңгд орҗадг сурһульчнр болн мергҗлтнр тәәз деер һарв. Эдн веб-дизайна (программистнрин марһан), уячнрин, электрокүчнә, тооһин халхар хамгин эвтә-довтаһинь йилһҗ авх. Багмудын ханьд баһчуд орна, эдн цугтан дөрлдхәр бәәхән иткүлв.
Эдн эврә колледжин марһанд орлцҗ диилвр бәрлә, тегәд цааранднь сән күцәмҗ күрхәр шунҗана. Ут турштан 31 орлцач энд цуглрв. «Эднә көдлмшиг мана колледжин багшнр - дамшлтта шинҗләчнр үнлх, – гиҗ колледжин һардачин дарук Бембин Екатерина келв.
Дарунь марһан эклв. Цуг талвңгуд белн болв. Сурһульчнр болн оютнр кергслән белдв. «Абилимпикс» марһанд шалтгта оютнр, сурһульчнр, мергҗлтнр эв-дован өөдлүлҗ йирин бәәдл-җирһлд тааста эрдмәрн көдлмш олҗ авч, өрк-бүлдән түшг болх. Уячнрин әңгин дөрлдәнд 18-ч тойгта дунд сурһулин арвтнр, политехникин, нефтин болн газин, багшин колледжин оютнр болн мергҗлтнр орлцҗана.
Политехникин колледжд уячин эрдм даслһна халхар өдгә цага кергсл олзлгдҗана. Җил ирвәс марһанд орлцачнрин то өсәд йовна. Ода уячин, ишкәчин эрдм икәр керглгднә, тегәд мана әңгд кесг көвүд чигн дөрлдҗәнә. Дизайнерин, ке-сәәхн хувц үүдәҗ һарһдг мергҗлтин болн әмтн ода икәр керглдг нань чигн ховр эрдм дасч болҗана, терүнә тускар баһчудт кезә чигн цәәлһҗ келнәв», - гиҗ шинҗләч Валентина Васильева тоолвран медүлв.
Талдан талвңд шинҗләч Беслан Лобанов көдлв. Эн эврә әңгин онц тоотын тускар бас тодрхаһар келҗ өгв. «Тооһин марһан бас амр биш болв. Күүкд «Макс» зәңгллһнә эв-арһин аһуд эврә һарцан үүдәҗ, талдан чигн даалһвр күцәх. Компьютерин эв-арһс энд сәәнәр медх кергтә. Мини сурһульчнрин эв-довнь җил ирвәс хурцдад йовна, тегәд «Абилимпикст» эв-арһан сөрлһн ик туста болна»,- гиҗ марһана шиҗләч келв.
Тер мет электромонтажникүдин талвңд болсн марһанд СВО-н ветеран Баатр түрүн болҗ орлцв. Цергә шишлң керг-үүлдврин ветеран олн зүсн көдлмш күцәҗ йовсмн. СВО-д одхин өмн электрикин эрдмиг политехникин колледжд дасла, ода гертән эвдрсн хамг тоотыг ясна, таньл-үзлдән чигн дөңгән күргнә. Марһанд орлцтн гисн үрвр кехлә, Баатр дарунь зөвән өгәд, эв-дован сөрхәр шиидв. Тиим дааврта дөрлдәнд цергә керг-үүлдврин ветеранд күцәмҗ дурдҗанавидн, мергҗлтән өөдлүлҗ йовтха, цуг орлцачнр багшнран байрлулҗ сурһулин нериг өөдән бәртхә, гиҗ мөрәдҗәнәвидн.
Таңһчин «Абилимпикс» марһан һурвн өдртән болх. Таңһчин марһана дииләчнр зунар шүүврин керг-үүлдврт орлцхмн.

ТҮРВӘН Һуна

Видео