Сурһмҗин тускар эк-эцкнрлә күүндв

Сегодня, 17:06 | Общество, Таңһчин зәңгс, Зіњг, Эрўл-менд харлһн

Элстд «Медрл» олна ниицәнә седвәрәр сурһульчнрин эк-эцкнрин төлә сурһмҗин болн сурһулин төрмүдәр харһлтс давулгдҗана. Түрүн харһлтс Элстин техническ лицейд, Зая-Пандитан нертә хальмг этносойлын гимназьд болв.
«Медрл» олна ниицәнә таңһчд үүлддг әңгин һардач Манҗин Элеоноран келсәр, хаврин амрлһна өдрмүд угтҗ, эк-эцкнрлә харһлтс бүрдәгдв. Удл уга сурһулин җилин сүл девсң эклхмн, энтн эк-эцкнрин төлә дааврта кем болна. Эн цагт сурһульчнрт эк-эцкнрин дөң эрк биш кергтә. Хаврин амрлһна кемд сурһульчнрла чинртә төрмүдәр күүндәд, сул цаган хамдан сергмҗтәһәр болн тустаһар давулҗ болхмн.
Элстин техническ лицейин һардачин дарук Очра Светлана сурһульчнрин эк-эцкнрт шүүврин кемд күүкдән урмдулҗ дөңнхин туст сүв-селвг өгв. Шаңһа шүүврт белдсн болн терүг өгсн цагт сурһульчнрт эк-эцкнрин килмҗ ик урмдта болна гиҗ багш келв. Зая-Пандитан нертә Хальмг этносойлын гимназин һардач Лиҗин Елена сурһульчнрин эк-эцкнрлә болсн харһлтд бичкдүдт төрскнч сурһмҗ өглһнә тускар күүндв. Төрскн һазр-усндан эңкр болхин, ямр нег шиидвр авсн цагтан дааврта болхин тускар күүндәд, эврә үрдтән үлгүр болхмн гиҗ сурһулин бүрдәцин һардач селвглв. Дорас өсч йовдг бичкдүд сурһулин болн балһсна буйнч седклин керг-үүлдврмүдт орлцҗ, өөрән бәәдг улст килмҗән тусхаҗ үнн кевәр үүлдхин төлә эк-эцкнр бийснь седвәртә, шунлтта болх зөвтә гив.
«Медрл» олна ниицәнә таңһчд үүлддг әңгин лектормуд Элст балһсна сурһуль-эрдмин бүрдәцст харһлтс давулҗ, эк-эцкнриг соньмсулҗадг төрмүдәр күүнднә. Очра Номтын нертә 8-ч тойгта дунд сурһульд бичкдүдин сурһуль урмдуллһна төр босхгдв, 4-ч тойгта дунд сурһульд болхла сурһульчнр герин даалһвр күцәлһнә халхар учрдг дуту-дундсин тускар күүндв.
ДАВАН Наталья

Видео