Әәмшг уга бәәдл тогтахар

Сегодня, 13:13 | Общество, Таңһчин зәңгс, Зіњг

Шидр Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан һардврт хальдврта гемәс саглуллһна комиссин дарани сүүр болв. Терүнд бруцеллез болн безг гемәс хөрлһнә туст тәрлһ келһнә төрмүд хәләгдв.
Таңһчин селәнә эдл-ахуст бруцеллез гемин туст тогтсн бәәдлин тускар Хальмг Таңһчин ветеринарийин Заллтын һардачин дарук Качкан Виталий зәңгллһ кев. Дааврта һардачин келсәр, малын дунд бруцеллез гем дару-дарунь илдкгдҗәхнь мана таңһчд нәрн төр болҗана. Сүл һучн җилин туршарт селәнә эдл-ахус тарад, теднә ормд крестьянск-фермерск болн онц эздин эдл-ахус бүрдәгдснә ашт эн гемәс хөрлһнә керг күцәхд амр биш болв. Эн гемиг урдаснь илдкҗ авхин төлә бод малын болн хөөдин шинҗллт давуллһна зура җил болһн батлгдна. Келхд, малын эмчнр эн зураг сән йовудтаһар күцәҗ, райодын эдл-ахуст бәәдг мал шинҗлнә. Тиигәд, эдн эн җилин эклцәр хойр сарин туршарт 9674 толһа бод мал болн 16327 хө шинҗлҗ хәләв. Нидн 617155 толһа бод мал дундас 416-днь болн 1 сай 52 миңһн хөөнәс 310-днь эн гем илдкгдсн билә. Энүнә хөөн эдл-ахун туст хаслһна диг-даран батлгдҗ, эн гемәс хөрлһнә керг-үүлдврмүд күцәгднә гиҗ Качкана Виталий келв. Эндр мана таңһчд 18 эдл-ахуд ирлцңгү халхар нәрн бәәдл тогтсн бәәнә.
Хәләгдсн төрәр Россельхознадзорин таңһчд үүлддг заллтын һардачин дарук Бакугинә Жан, таңһчин эрүл-менд харлһна министрин дарук Нәәмнә Бембә, зәрм райодын элчнр үг авад, онц эздин малыг «Хорриот» эв-арһ олзлҗ тоод авлһна, хальдврта гемәс хөрлһнә кергт орлцуллһна тускар ухан-тоолврарн хувалцв.
Һаза дулархла, безг гем учрдг, тегәд терүнәс саглуллһна керг-үүлдврмүдин тускар Роспотребнадзорин таңһчд үүлддг заллтын әңгин һардач Сергей Савченко тооцаһан өгв. Безг гем мана орн-нутгин Өмн үзгин болн Ар Кавказин дуһргудт учрна. Хәрнь, сүл йисн җилин туршарт мана таңһчд эн гемәр гемтсн йовдлмудын то баһрв, 2014 җиләс авн нег чигн күн хорсн уга. Нидн зуг һурвн күн эн гемәр гемтснь шинҗллтин ашт илдкгдв. Эдн селәнә эдл-ахун халхар көдлдг улс болҗ һарв. Давсн җилд 543 күн шалз харшлсна тускар медүлв, теднәснь 212 бичкдүд бәәсмн. Олн-әмтн цуглрдг һазриг эд-бод кеҗ, цаглань өвс хадҗ белдх кергтә гиҗ сүүрт келгдв.
Олн зүсн гемәс хөрлһнә санитарн-эпидемиологическ комиссин гешүд хәләгдсн төрмүдәр шиидвр батлҗ авв. Энүг эрк биш күцәҗ, саглуллһна керг-үүлдврмүдиг яһҗ күцәҗәхинь чаңһ кевәр бүрткх кергтә гиҗ Өлзәтин Марина некв.
Мана зәңгч

Видео