Билгтә бичкдүд марһлдв

Сегодня, 13:48 | Общество, Таңһчин зәңгс, Зіњг

Моһа сарин 28-д Элстд «Хрустальные звездочки» нертә Цугәрәсән марһана региона девсңгин ашнь диглгдв. Марһанд таңһчин зарһин приставмудын болн зөв-йос харлһна бүрдәцсин көдләчнрин үрд орлцв. Эн җилин марһанд орлцхар 40 эрлһн орҗ ирв. Марһан 7-ас авн 12 күртл, 13-ас авн 18 күртл, дууна, бииһин болн көгҗмин зевсгүд цокдг һурвн әңгәр хувагдв.
Хальмг Таңһчар үүлддг Әрәсән УФССП-н ах пристав Роман Мухортов керг-үүлдвриг секч, иим марһан җил болһн давулгдад, зөв-йос харлһна бүрдәцсин көдләчнрин билгтә күүкдиг йилһҗ авхд туслна гиҗ келв. Марһанд орлцсн көвүд-күүкд бииһин болн дууна эрдмән үзүлв. Энүнә йовудт хальмг домбрин болн фортепианон, хуучн ут дууна болн өдгә цагин бииһин айсмуд соңсгдв.
Таңһчин нертә билгтнр болн багшнр: Хальмгин күндтә иргн, билг-эрдмин ачта үүлдәч, Е.Толкачевин нертә «Тюльпанчик» ансамблин һардач Людмила Толкачева, таңһчин сойлын ачта көдләч «Веснушки» ансамблин һардач Виктория Солодкая, Чонкуша Петрин нертә билг-эрдмин колледжин багш, Хальмг Таңһчин ачта багш Җирнтән Галина болн УФССП-н элч Дорҗ-Һәрән Эльзана күндтә жюрин ханьд орсмн.
Марһана ашар дууна әңгд Нарна Денис (УФССП) болн Долгана Дарима (МЧС) ончрв. Бииһин марһанд болхла бичкн билгтнр хальмг, китд болн өдгә цагин би үзүлв. Энүнд «Сказка» коллектив «Баатрмудын нойхд» би олна оньгт тусхаһад диилвр бәрв. Хамгин ах наста орлцачнрин әңгд болхла Окна Энкира «Дон Кихот» балетын би бииләд ончрсн болдг.
Зевсгүд цокдг әңгд зарһин приставмудын көдләчнрин үрдин ансамбль хальмг айсмуд соңсхад нүүрт һарв. Ах багд болхла Цаһан Амн селәнә 2-ч тойгта дунд сурһулин элч Эльдшә Эвелина түрүн орм эзлв.
Марһана дииләчнр Күндллһнә һашгудар болн белгүдәр ачлгдв. Иим кевәр билгтә бичкдүдиг марһаст орлцулҗ, цааранднь чигн дөңнх кергтә. Иргчдән эдн таңһчин нер дуудулхнь лавта.
КАРСАНА Евгения

Видео