Диилвр бәрҗ таңһчин нер туурултха!

Сегодня, 14:22 | Общество, Таңһчин зәңгс, Зіњг

Целинн района Троицкое селәнә «Алтн түлкүр» бичкдүдин садын ах сурһмҗлач, селәнә депутатнрин Хургин депутат Тактинә Алла «Цергллһн» гидг Цугәрәсән марһана ашлгч девсңд һарв. Келхд, Хальмг Таңһчин элч түрүн болҗ сән гисн 110 мергҗлтин тоод орв. Эн марһан мана орн-нутгин муниципальн цергллтин йилһән сән мергҗлтнриг йилһҗ авч дөңнхин төлә бүрдәҗ давулгдна. Шидр бидн Алла Владимировнала харһад күүндвидн.
Цернә (күүкн цага нер-уснь) Алла Баһ Дөрвдә района Ханата селәнд өсәд-боссмн. Эк-эцкнь, Нина Каруевна Владимир Алексеевич хойр күүкн-көвүһән өкәрлҗ өскәд, чик сурһмҗ өгч, үлгүр болдг бәәсмн. Эк-эцкнь төрскн селәндән олн җилдән көдләд, отг-әәмгтән күндтә болн тоомсрта улс болҗ тоолгдна. Алла дунд сурһулян, Х.Кануковин нертә багшнрин колледжиг болн Б.Б.Городовиковин нертә Хальмг ик сурһулиг йилһән сәәнәр төгсәсмн. Эн Уңһн Төрәч селәнә бичкдүдин садт сурһмҗлачар күч-көлснә хаалһан эклсн мөн. Ода Алла Владимировна Хальмг Таңһчин сурһмҗлачнрин ниицәнә ахлач болна, 2024 җилд «Сурһуль-эрдмин нүүрләчнр» гидг Әрәсән марһанд диилвр бәрсн билә. Евгений ахнь Чечняд, ода болхла цергә шишлң керг-үүлдврт орлцҗ, залу-зөрмгән үзүлҗ, эк-эцкиннь нер өөдән бәрҗ йовна.
- Сурһуль-эрдмин халхар ут тоодан хөрн һар җилдән көдлҗәнәв. Эн бичкдүдин садт арвн җилдән ах сурһмҗлачин үүл дааҗанав, хойр җил хооран намаг Троицкое селәнә депутатд суңһла. Района сурһуль-эрдмин заллт бидн «Кадрмудын көрң: муниципалитетд билгтнрин заллтын халх тогталһн» гидг төсв белдәд, сурһуль-эрдмин бүрдәцст көдлҗәдг мергҗлтнрин седвәр дөңнлһнә, эднә билг-эрдм делгрүллһнә, мергҗлт өөдлүллһнә керг-үүлдвр күцәҗәнәвидн. Тер мет баһчуд селәдин сурһуль-эрдмин бүрдәцд ирҗ көдлхиг урмдулхин төлә чигн эн төсв белдвидн. Баһ наста багшнриг болн сурһмҗлачнриг байн дамшлтта мергҗлтнр дөңнәд, олн зүсн төрәр сүв-селвгән өгәд, көдлмшин халхар нөкд болна. Эн төсвд орлцсн мергҗлтнрәс хойрнь ода дааврта үүлд батлгдв. Тиигәд Түрвән Марина Г.Жуковин нертә Троицкое селәнә дунд сурһулиг болн Ольга Курдюкова «Буратино» бичкдүдин садыг һардв. «Цергллһн» гидг Әрәсән марһанд мана төсвиг өөдәнәр үнлснь маднд бахмҗ үүдәҗ, ик урмд өгв, - гиҗ Алла Владимировна келв.
Орн-нутгин марһана хайгар эн җил 63 миңһн эрлһн орҗ ирсмн, теднәснь зуг 110 күн ашлгч марһанд орх зөв авв, теднә тоод мана таңһчин элч Тактинә Алла «Мергҗлттә кадрмуд – муниципалитетин иргч» әңгд орлцҗана. Мөрн сарин 6 күртл әмтн дууһан өгәд, марһана дииләчнриг йилһҗ авхмн, эн сарин 21-д болхла Москвад «Бичкн Төрскн - Әрәсән күчн» гидг орн-нутгин муниципальн ик хургт эн марһанд диилвр бәрсн мергҗлтнр цуглрхмн. Алла Владимировнан келсәр, нег һазра әмтн, хамдан көдлҗәдг үүрмүд, талдан регионмудт бәәдг таньл-үзл улс энүг дөңнҗ, дууһан өгснд эн ик ханлтан өргҗәнә. Целинн района сурһуль-эрдмин заллтын һардач Чульчан Эльза болн «Алтн түлкүр» бичкдүдин садын һардачин дарук Ольга Пинаева ирлцңгү төсв энүнлә хамдан белдсмн.
Тактинә Алла төрскнч седклтә, хальмг келндән хару, өвкнриннь авъяс әрүнәр хадһлдг күн мөн. Эн бийнь, Ноһала болн Заяна күүкднь домбр цокна, Бадм көвүнь ода көгҗмин сурһульд сурчана. Басң авальтаһан эдн олн җилин эргцд нег-негән дөңнҗ, ниитә бәәнә. Герин эзн Росгвардин Хальмг Таңһчд үүлддг заллтд көдлнә, тегәд эн цергә шишлң керг-үүлдврт орлцҗана.

ДООҖАН Наталья
ЗУРГТ: ах сурһмҗлач Тактинә Алла бичкдүдлә кичәл давулҗана

Сурһуль-эрдмин көдләчнриг урмдулҗ.
ТҮРВӘН Марина, Г.Жуковин нертә Троицкое селәнә дунд сурһулин һардач:
- Би Алла Владимировнан үүдәсн төсв күцәлһнд орлцад, давсн җилин моһа сарас авн дунд сурһулин һардач болҗ көдлҗәнәв. Овата селәнә дунд сурһулин һардач Бадран Марина мини сурһмҗлгч болад, байн дамшлтарн хувалцҗ, нөкд болв. Марина Леонидовна нидн «Җилин сән гисн һардач» таңһчин марһанд диилвр бәрсмн, эн төсв района сурһуль-эрдмин көдләчнрин мергҗлт өөдлүлҗ, баһ наста багшнриг урмдуллһнд туслна. Тиигәд, нидн мана дунд сурһульд һурвн багш күч-көлснә хаалһан эклв, эднд района һардвр 100 миңһн арслңга мөрә һарһҗ өгв. Дәкәд баахн мергҗлтнриг дөңнлһнә көтлврин йовудт таңһчин сурһуль-эрдмин болн номин министерств эднд урмдулгч 500 миңһн арслңга дем өгв. Баахн багшнриг дамшлтта ах үүрмүднь дөңнәд, күч-көлснә хаалһан эклхднь нөкд болна. Мана дунд сурһульд 2024 җилд бат ясвр кегдв, эндр 445 сурһульч сурчана, багшнр мергҗлтән өөдлүләд, көдлмшән үнн-чик седклтәһәр күцәхәр шунҗана. Алла Владимировнан төсв Әрәсән марһанд сәәнд тоолгдад, мана сурһмҗлач диилвр бәртхә гиҗ дурдҗанав.

Видео