Поштын әңгүдиг дөңнх кергтә

Сегодня, 14:28 | Политика, Общество, Таңһчин зәңгс, Зіњг

Урҗ өдр Хальмг Таңһчин Улсин Хуралын (Парламентин) дарани сессь болв. Әрәсән Президентин ЮФО-д күцц зөвтә элчлтин Хальмг Таңһчд федеральн ах инспектор Александр Беляев, таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин элчнр терүнд орлцв. Хальмг Таңһчин Улсин Хуралын Ахлач Артем Михайлов сүүриг һардҗ давулв. Эн сүүрт ут тоодан 12 төр хәләгдв.
Авъяст тохрсар сүүрин эклцәр депутатнр ниицлтин зарһчнриг үүлднь батлв. Таңһчин Улсин Хуралд Хальмг Таңһчин Толһачин элч Манҗин Араш эн үүлд орх улсин тускар депутатнрт цәәлһвр өгв. Тиигәд, Дюмкән Мергн Лаганя, Боован Дорҗ Үстин болн Габуна Мария Элстин 2-ч тойгта ниицлтин зарһин әңгүдин зарһчнрт батлгдв.
Дарунь депутатнр коррупц гетллһнә, бәәрн залврин, авлна, административн йос эвдлһнә, Хальмгин Улан дегтрин туск таңһчин закадт сольвр оруллһна закадын төсв хәләһәд батлв. Хальмг Таңһчин залврин Ахлачин дарук – тооһин делгрлтин министр Этән Алексей алвна туск таңһчин заканд сольвр орулад, «Әрәсән пошт» бүрдәцд 2026-2030 җилмүдт авлна туст онц зөвин таал тогталһна туск закана төсвин халхар келв. Эн бүрдәцин туст эндр нәрн бәәдл тогтв, тегәд тавн җилин эргцд өлг-эдин болн көлгнә алвна туст онц зөв өгәд, хоршасн мөңгиг таңһчд үүлддг поштын әңгүдт бат ясвр келһнд һарһх кергтә гив. Хальмг Таңһчд Әрәсән поштын әңгин һардач Юрий Антонов бүрдәцин үүлдврин тускар келәд, депутатнрин сурврмудт хәрү өгснә дару эн закана төсв батлгдв.
Улсин Хуралын сессьт Хальмг Таңһчин залвр тооцаһан өглһнә төр дару-дарунь хәләгднә. Эн сүүрт таңһчин дотр-дундын кергүдин министерствин 2025 җилд кесн көдлмшин аш диглгдв. Министр Дмитрий Григорьев таңһчд әәмшг уга бәәдл тетклһнә, зөв-йос эвдсн йовдлмудас болн коррупцәс хөрлһнә, насни дигт күрәд уга бичкдүд дунд саглуллһна керг-үүлдврмүд давуллһна көдлмшин тускар тодрхаһар келәд, нидн таңһчд 2510 зөв эвдсн йовдл учрв гив. Келхд, мана таңһч Әрәсән Өмн үзгин регионмуд дундас нүүрт һарв. Нидн таңһчд олн орлцата 1740 керг-үүлдвр давулгдв, дотр-дундын кергүдин көдләчнр әәмшг уга бәәдл теткҗ, дигтә-дарата бәәдл тогтав. Депутатнр дотр-дундын кергүдин көдләчнрин дааврта көдлмш үнлҗ темдглв, болв зөв-йос эвдсн йовдлмуд саглуллһна төрт онц оньг тусхах кергтә гиҗ селвг өгв.
Сүүрин чилгчәр депутатнр әмтнлә болдг харһлтсин йовудт босхгдсн төрмүдин тускар күүндв. Тиигәд, депутат Эрнҗәнә Петрин келсәр, Яшалтан района әмтн түргн дөң күрглһнә көлг тосн-түләһәр тетклһнә төр хаһлхинь сурв. Таңһчин эрүл-менд харлһна министр Саран Булат төрмүдәр цәәлһвр өгәд бүртклһнә керг-үүлдвр давулх болв. Тәрәчнрт зәрм һаруһинь даңцалһнд шаңһас демин мөңгн өггдх зөвтә, зуг эдн 2023 җиләс авн терүгән авад уга гиҗ депутат Эрнҗәнә Петр бас сурвр өгв. Хальмг Таңһчин залврин Ахлач Босхмҗин Гиләнә келсәр, селәнә эдл-ахун халхд ода һурвн миңһн фермер, онц эзн болн эдл-аху тоод авгдсн бәәнә, эдниг дөңнлһнә халхар 24 керг-үүлдвр күцәгднә, эн кергт 1 җува арслң шаңһас йилһгднә гив. Тәрәчнрт болн малчнрт җил болһн, тәрәнә эк хулдҗ авлһнд, царцахала ноодлһна кергт шаңһа дем өггднә. Эдн җил болһн тооцаһан өгнә, тегәд 2023 җиләс авн демин мөңг эс авдг йовдл учрх зөв уга, гиҗ таңһчин залврин Ахлач цәәлһвр өгв.
БАТАН Сәәхлә

Видео