Олна көдлмш күцәһәд

Хальмг Таңһчин Олна палатын гешүд шин төсв экләд күцәҗәнә. Шидр «Деловые завтраки» нертә төсв күцәлһнә йовудт таңһчин йосна, бизнесин, баһчудын болн талдан бүрдәцсин элчнрин орлцлһтаһар чинртә харһлт болв.

Така сарин 5-д темдглгдх Хальмг Таңһчин Өдр угтҗ, эн түрүн харһлт бүрдәгдв. Хальмгин залврин Ахлачин негдгч дарук Цернә Эрднь болн таңһчин Толһачин һардврин ахлачин дарук Шипин Екатерина терүг һардҗ давулв.
Шинрүлгдсн таңһчин Олна палатын гешүд кесг бүрдәцсин элчнрлә өөрхнәр таньлдад, кех-күцәх көдлмшин зура батлв. Хальмг Таңһчин Өдрән темдглхәс урд нег һазра улсин сүв-селвгүдинь болн ухан-тоолвринь эрк биш учртан авх кергтә гиҗ харһлтд келгдв.
Олна палатын ахлач Мучан Батырин темдглсәр, бүрдәцин шин ханьд олн зүсн эрдмтә улс орв, тегәд ямр чигн кергиг эдн хамдан ниитәһәр күцәҗ чадхмн гиҗ товчлв.
ОЛЬДАН Цаһан