Эрмдгтә улсин төрмүд хаһлад

Сегодня, 13:28 | Общество, Таңһчин зәңгс, Зіњг

Шидр нүднә харань муурсн улсин Әрәсән олна ниицәнә (ВОС) таңһчд үүлддг әңгин хург болв. Терүнд тавн җилин эргцд кесн көдлмшин аш диглгдәд, олна бүрдәцин ахлачиг суңһв, намртан Москва балһснд болх ВОС-ин ик хургт орлцх элчиг йилһҗ авв. Әрәсән Өмн үзгт ВОС-ин һардачин күцц зөвтә элч, нүднә харань муурсн улсин Краснодарск крайин ниицәнә ахлач Юрий Третьяк, Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга, гемтә-шалтгта улсин таңһчин олна ниицәнә ахлач Валерий Решетников хургт орлцв.
Таңһчд үүлддг әңгин ахлачин нөкд Оруса Лидия тавн җилин эргцд ямаран көдлмш күцәгдснә, эрмдгтә улсин социальн харслтын, көдлмшәр тетклһнә, эрүл-менд харлһна керг-үүлдврмүдин тускар тодрхаһар зәңглв. Таңһчин әңгд 534 гешүн тоод авгдсн бәәнә, Лаганя, Городовиковск болн Баһ Дөрвдә райодт бәәрн әңгүд үүлднә. Таңһчин әңгин ахлач Хальмг Таңһчин Толһачин медлд үүлддг гемтә-шалтгта улсин Хүүвин ханьд орна, күцәгч болн бәәрн йосна бүрдәцслә нөкцлт батрулҗ, гемтә-шалтгта улсин төрмүд хаһлна. Эрмдгтә улст сән кец-таал тогталһна, көдлмшәр тетклһнә, социальн теткврин көтлврмүдин йовудт региона әңгин ахлач райодын, хотл балһсна толһачнрла, таңһчин бүрдәцсин һардачнрла хамцу үүлднә. Тиигәд, бат залһлда батрулгдсна ашт райодт нүднә харань муурсн улсин олна ниицәсин әңгүдт бәәрн йилһгдсн бәәнә, эргндк һазрт сән таал тогтагдв, өгъәллһнә мөңгн авгдхш гиҗ Лидия Эренценовна темдглв. Таңһчин күцәгч болн бәәрн һазрт йос заллһна бүрдәцс олна ниицәнә гешүдиг дөңнҗ, эднә билг-эрдм делгрүллһнә, спортын болн нань чигн керг-үүлдврмүд давулхд дөңгән күргнә. Эрмдгтә улсин нарт-делкән Өдрт Элст балһсна һардврин толһачин мөрә бәрүлҗ өггднә. Нүднә харань муурсн улс дунд шатрар болн дөөвәр марһа давуллһн сән авъяст тохрв, арһлачнр, таңһчин бүрдәцсин көдләчнр бас демән өгнә. Таңһчин әңгин гешүд орн-нутгин керг-үүлдврмүдт бас шунмһаһар орлцҗ, дииләчнрин тоод орна. Тиигәд, Казанцевихнә өрк-бүл «Хойр җивр» марһанд ончрв, «Әрәсән күчн» гидг Әрәсән наадмд әңгин гешүд бас күцәмҗ бәрв.
- Мана әңг коммерческ биш бүрдәцс дунд болдг марһанд орлцад, һурвн дәкҗ мөрә шүүҗ авад, нүднә харань муурсн улсин төлә соньн көтлврмүд күцәв. 2021 җилд 422 миңһн арслңга мөрә шүүҗ авад, шишлң шатр болн дөөв хулдҗ авлавидн, 2022 җилд болхла Элстд гемтә-шалтгта бичкдүдин 4-ч тойгта садын күүкд дунд зургудын марһа давулвидн. 2023 җилд болхла шүүҗ авсн 682 миңһн арслңгар шишлң төсв күцәһәд, хам-хоша бәәдг регионмудын гемтә-шалтгта улсин төлә аудиэкскурсь бүрдәсн биләвидн. Ода бидн «Төрскән харсачнр» шаңһа саңгин таңһчд үүлддг әңглә бооца батлад, цергә шишлң керг-үүлдврин йовудт шавтсн дәәчнрт дөң күрглһнә көдлмш шунмһадулҗанавидн. Цергә керг-үүлдврт орлцсн 5 ветеран мана әңгин гешүд болв, - гиҗ Лидия Эренценовна келв.
Сүл тавн җилин эргцд олна ниицәнә һардвр баһ биш көдлмш күцәв гиҗ таңһчин әңгин гешүд үнләд, цааранднь чигн эрмдгтә улсин зөв харслһна төрмүдиг күцәмҗтәһәр хаһлҗ үүлдхиг дурдв. Хургт орлцачнрин шиидврәр Эрнцнә Людмила таңһчин әңгин ахлачд дәкн суңһгдв. Тер мет Людмила Семеновна намртан Москва балһснд болх нүднә харань муурсн улсин Әрәсән хургт орлцх болҗ шиидгдв.
ДООҖАН Наталья

Видео