Сансрин делкә соньн болв

1961 җилин мөрн сарин 12-т советск космонавт Юрий Гагарин цугтаһаснь түрүлҗ сансрт ниссмн. Эн ончта йовдл учрсна 65 җилин өөнд нерәдәд, орн-нутгт кесг керг-үүлдвр бүрдәгдв. Мана таңһчд чигн өөнин керг-үүлдврмүд бас болв. Дәәнә ветеранмудын госпиталин көдләчнрин седвәрәр эднә бичкдүд дунд зургудын болн һарин кегдлмүдин марһан зарлгдсн билә.
Эмнлһнә бүрдәцин һардач Модонкан Оксанан келсәр, көдләчнрин үрд дунд билг-эрдмин марһас давуллһн сән авъяст тохрв. Тиигәд, нидн намрар күүкд-көвүд «Алтн намр» гидг марһанд орлцсн билә. Удл уга Алдр Диилврт болн Әрәсән улсин ниицлтин җилд нерәдгдсн марһан болхмн гиҗ зуралгдҗана. Госпиталин көдләчнрин профсоюзн бүрдәцин ахлач Үлмҗин Җирһл бичкдүд дунд марһа зарлҗ, терүнд орлцачнрт белг хулдҗ авхд дөңгән күргнә.
– Мана марһанд 4-әс авн 15 нас күрсн 13 күүкд орлцв. Эднәс тавнь эн җил сурһульд орхмн, тегәд медрлин Өдрлә эдниг бас дуудад 1-ч класст орҗадг йовдлла йөрәхвидн. Мана бичкдүд билгтә, седвәртә, сурһулян сәәнәр сурдг күүкд болҗ өстхә гиҗ бидн иим керг-үүлдврмүд давулнавидн. Эн марһанд болхла бичкдүд сансрин төрәр соньмсад, ке-сәәхн кегдлмүд кеҗ, зургуд зурҗ эк-эцктәһән цаган тустаһар давулхиг урмдулх күсл тәвсн биләвидн. Темдглхәс, күүкд-көвүд билг-эрдмән һарһад, сәәхн зургуд зурснь, өвәрц кегдлмүд кеснь маднд ик бахмҗ үүдәв. Бидн мана бичкдүдт болн эднә эк-эцкнрт ханлтан өргҗәнәвидн, – гиҗ Оксана Чоинговна келв.
Марһанд орлцсн күүкд дунд дииләчнриг йилһҗ авхин төлә ниигмин сүлҗәнә эв-арһар дууһан өгч, таасгдсн зург эс гиҗ кегдл йилһҗ авх кергтә бәәсмн. Уйн наста зурачнр дунд Меткән Мирослава болн Катыша Баина диилвр бәрв. Босхмҗин Алексей Александр ах-дү хойр, Хаминә Байр соньн кегдлмүд кеҗ һарһад ончрв. Леша Саша хойр Целинн района Троицкое селәнә «Харада» бичкдүдин садт орна. Эднә эк Босхмҗин Җирһлин келсәр, көвүд намрин төрәр болсн марһанд бас шунмһаһар орлцсн билә. Дөнтә Леша болн зурһата Саша олн зүсн кегдлмүд кенә, зургуд зурна.
Хальмг Таңһчин эрүл-менд харлһна министерствин көдләч Оксана Велегурина бичкдүдиг йөрәһәд, эднә зургуд болн кегдлмүд йир сәәхн болҗ цугтаднь таасгдв гиҗ эдниг буульв. Госпиталин көдләчнр болхла бичкдүдтән килмҗ тусхаҗ, эдн хоорндан таньлдад, цаган сергмҗтәһәр болн тустаһар давулхин төлә иим керг-үүлдврмүд бүрдәдгиг эн бас темдглв. Марһанд орлцсн күүкд-көвүдиг дипломсар болн медальмүдәр ачлад, наадһас белглв. Хөөннь цуһар хамдан цә ууһад, сергмҗтәһәр амрв.

БАТАН Сәәхлә