Хамцу үүлдврнь күцәмҗтә болв

Урҗ өдр Ростов-на-Дону балһснд Әрәсән Өмн үзгин парламентск Ассоциацин 25 җилин өөнд нерәдгдсн байрин хург болв. ЮФО-д Әрәсән Президентин күцц зөвтә элч Владимир Устинов, Әрәсән Федерацин Хүүвин Ахлачин дарук Андрей Яцкин, Әрәсән Орн-нутгин Хүүвин Ахлачин дарук Виктория Абрамченко болн Ростовин мүҗин һардач Юрий Слюсарь терүнд орлцад, ниицәнә ханьд ордг регионмудын зака үүдәгч бүрдәцсин элчнриг йөрәв. Хальмг Таңһчин Улсин Хуралын (Парламентин) Ахлач Артем Михайлов байрин керг-үүлдврт бас орлцв.
ЮРПА-н ахлач, Севастополь балһсна зака үүдәгч Хургин ахлач Владимир Немцев байрин хургиг нүр үгәр секәд, ниицәнә гешүд 25 җилин эргцд ниитәһәр үүлдҗ, җил ирвәс мана парламентск өрк-бүл өсәд йовна гиҗ темдглв.
- Зака үүдәгч бүрдәцсин ниицән эн җилмүдин эргцд орн-нутгин зака үүдәгч үүлдврт бас тусан күргҗәнә. Эрүл-менд харлһна, сурһуль-эрдмин, гер-бүүрин коммунальн эдл-ахун, йиртмҗ харлһна, селәнә эдл-ахун чинртә төрмүд тана һол оньгт бәәнә. Әмтнә социальн харслһна болн нань чигн талдан төрмүдәр орулгдсн седвәриг орн-нутгт дөңнҗ шин закад батлгдснь Хүүвин үүлдвр күцәмҗтә болҗахиг иткүлҗәнә. Эндр регионмудт күцәгдҗәдг цергә шишлң керг-үүлдврт орлцачнриг болн теднә өрк-бүлмүдин гешүдиг дөңнлһнә сән гисн дамшлтыг хамцулад, цааранднь тедниг тархалһн ЮРПА-н һол күсл болҗана. Тер мет өрк-бүлмүдиг, бичкдүдиг болн ах үйин улсиг дөңнлһнә керг-үүлдврмүдт бас онц оньг кергтә, - гиҗ Владимир Устинов йөрәлин үгдән темдглв.
Эн җил Әрәсән Орн-нутгин Хүүв 120 җилин өөнән темдглҗәнә. Сән авъяст тохрсар, өөнин керг-үүлдврмүд Санкт-Петербург балһснд болхмн. Орн-нутгин регионмудын зака үүдәгч бүрдәцсин ахлачнр Орн-нутгин Хургин медлд үүлддг зака үүлдәчнрин Хүүвин көдлмшт орлцхмн. Эн хург Әрәсән улсин ниицлтин җилд нерәдгдхмн, гиҗ Андрей Яцкин келәд, Әрәсән Федерацин Хүүвин Ахлач Валентина Матвиенко илгәсн йөрәлин бичг олнд соңсхад умшв. Виктория Абрамченкон темдглсәр, ЮРПА-н ниицән Орн-нутгин Хүүвин нәәмдгч хуралтд ут тоодан 60 закана төсв орулв, теднәснь 19-нь шаңһа закадт хүврв. Регионмудын зака үүдәгч бүрдәцс мана орн-нутгин иргнмүдин бәәдл-җирһлин төлә ик чинр зүүдг төсвс белднә. Эннь әмтнә социальн харслтын, эрүл-менд харлһна, промышленностин делгрлтин, селәнә эдл-ахун, кадрмуд белдлһнә, көлгн-күчнә болн нань чигн төрмүдәр белдсн төсвс мөн. Әмтнә төлә әәмшг уга бәәдл тетклһнә болн йиртмҗ харлһна төрмүд бас эднә һол оньгт бәәнә гиҗ Виктория Абрамченко келәд, Хүүвин ханьд ордг зака үүдәгч бүрдәцсин үүлдвриг өөдәнәр үнлв. Әрәсән Орн-нутгин Хүүвин Ахлач Вячеслав Володин илгәсн йөрәлин бичгиг хургт орлцачнр байртаһар тосв.
- Мана Хүүвин гешүд орулдг седвәрмүд Әрәсән Өмн үзгин болн Ар Кавказин әмтнә төлә ик чинр зүүнә. Мана Хүүв цааранднь делгрҗ, мана таңһчин улсин бәәтхә, Әрәсән цуг иргнмүдин җирһл ясруллһнд туслх гиҗ санҗанав. Эн җилмүдин эргцд мана Хүүвин ханьд ордг зака үүдәгч бүрдәцс керг-төрин хәрлцә батрулсн деерән иньгллтин залһлда делгрүлҗ, ниитәһәр үүлдҗәнә,- гиҗ Артем Михайлов келв.
Хөрн тавн җил хооран Ростовин мүҗин болн Краснодарск крайин зака үүдәгч Хургудын Ахлачнр бәәсн Александр Попов болн Владимир Бекетов Әрәсән Өмн үзгин парламентск Хүүв бүрдәлһнә седвәр татсн улс мөн. ЮРПА-н 25 җилин өөнлә ирлцүләд, эдниг «Әрәсән Өмн үзгин ачта парламентарий» гидг өөнин темдгәр ачлв.
Байрин хургин хөөн Әрәсән субъектмүдин зака үүдәгч хургудын ахлачнрин селвлцән болв, парламентсин хоорндк нөкцлтин бооцан батлгдв. Комбайн кеҗ һарһдг «Ростсельмаш» заводт одснь бас соньн болв.
БАТАН Сәәхлә