Ухани булг дегтр әмтиг хамцулна

Сегодня, 11:48 | Общество, Таңһчин зәңгс, Зіњг

Элстд «Әрәсән келн улсин дегтрмүд» гидг нертә дегтрин яарм болв.
Таңһчин хотл балһснд болсн дегтрин яарм олн улсиг соньмсулв. Әрәсән Президент Владимир Путинә даалһврар сойлын эн керг-үүлдвр күцәгдсмн. А. Амр-Санана нертә Келн-улсин дегтрин саңгин болн Әрәсән дегтр һарһачнрин бүрдәцин хамцу үүлдврин ашт иим яарм давулгдв. «Әрәсән келн-улсин дегтрмүд» гидг яарм бүрдәлһнд Хальмг Таңһчин сойлын болн зуульчллһна министерств дөңгән күргв.
Дегтрин яармиг байрин бәәдлд секлһнә керг-үүлдвр А. Пушкинә бумбин өөрк талвңд болв. Хальмг Таңһчин сойлын болн зуульчллһна министр Бембин Евгений дегтрин яармд орлцачнриг йөрәв. «Цә шиңгн болвчн хотын дееҗ болдг. Кезәнәс авн цә хальмгудын һол хотнь болҗ йовна. Цаасн нимгн болвчн номин көлгн болдг», - гиҗ цецн хальмг үлгүр келәд, Евгений Владимирович йөрәлин үгән эклв. Медрл болн сойлын зөөр тархалһнд дегтрин чинрнь ик гиҗ министр темдглв. Дегтриг олн дунд тархалһнд, Әрәсән һазр болһна дегтр һарһачнрин үүдәврмүдиг умшачнрт күргҗ медүллһнд иим керг-үүлдврмүд туста болҗахин тускар эн келв.
Дегтр һарһачнрин бүрдәцин президент, «Цаһан балһсн» гидг дегтр һарһачин һардач Константин Чеченев, Әрәсән Федерацин Хүүвин ахлачин дарук Петр Толстойин йөрәлин бичг цугтаднь соңсхад умшв.
А. Амр-Санана нертә Келн-улсин дегтрин саңгин һардач Майя Безидеева дегтрин яармин бүрдәһәчнриг болн дегтрин байрт цуглрҗ ирсн улсиг йөрәһәд, эндрк керг-үүлдвр сойлын болн урн үгин делгрлтд ик чинр зүүҗәхинь темдглв.
Дегтрин яармиг секлһнә керг-үүлдврт таңһчин сойлын болн зуульчллһна министрин дарук Санҗрһа Герман, Әрәсән бичәчнрин ниицәнә Хальмг әңгин ахлач Бадака Татьяна, нань чигн улс орлцв. Хальмг Таңһчин ачта артистк Канкан Делгр дуулсн «Цецгәрич, Хальмг минь!» гидг дун әмтнд ик байр үүдәв.
Энд келн-улсин утх-зокъялын һәәхүл олна оньгт үзүлгдв. Әрәсән олн зүсн регионмудын дегтр һарһачнрин үүдәврмүд энд үзҗ болхмн билә. Тыван, Татарстана, Мордовь, Марий Эл, Удмурть, Чеченск Республикүдин болн нань чигн һазрин дегтрмүдлә эн һәәхүлд таньлдх арһ учрв.
Әрәсән улсин дегтрин яармд ирсн әмтн «Бумба» дегтр һарһачин, «Калмыкия» РИА-н болн нань чигн бәәрн дегтр һарһачнрин дегтрмүд хулдҗ авв.
Әрәсән олн регионас ирсн дегтр һарһачнр болн дегтрин саңгудын көдләчнр орлцсн «төгрг ширән» сүүр йир соньнар давв. Келн-улсин сойл тархалһна, дегтр һарһачнрин болн дегтрин саңгин көдләчнрин хоорндк нөкцлт делгрүллһнә, тер мет Әрәсән олн келн-улсин сойл делгрүллһнә халхар учрҗадг нань чигн төрмүдәр ирлцңгү сүүрт тохнята күүндвр болв.
Әрәсән дегтр һарһачнрин бүрдәңин президент Константин Чеченев, энүнә дарук Олег Филимонов болн А. Амр-Санана нертә Келн улсин дегтрин саңгин һардач Майя Безидеева эн күүндвриг һардҗ давулв.
Дегтрин яармд орлцачнр хамгин соньн төсвсән цуглрсн улст цәәлһҗ келҗ өгв. Татарстана дегтр һарһачнрин соньн төсвлә Л. Миннуллина таньлдулв. Удмуртьд ямаран шин көтлвр белдҗәхин тускар Г. Грязев келв.
Петрозаводск балһсна дегтр һарһачнр кеҗәдг тоотын тускар Е. Шустова келҗ өгснь әмтнә оньг авлв. Москван «Орс үг» дегтр һарһачнр өдгә цагт кеҗәдг хәәврин тускар И. Буторина келҗ өгәд сүүрт орлцачнриг соньмсулв.
ҖИРҺЛИН Кермн

Видео