Өнр-өсклң бүлин хөв-кишг

Сегодня, 11:58 | Общество, Таңһчин зәңгс, Зіњг

Җил болһн хөн сарин 15-д цуг нарт-делкәд өрк-бүлин Өдр темдглнә. Эн өдриг өрк-бүлмүдин төрмүдт һол оньг тусхахин төлә зарлсн болдг. Тернь учрта, юңгад гихлә өрк-бүл бат болн ниитә болхла, төрскн һазрнь, орн-нутгнь делгрәд, өргҗәд йовхнь лавта. Хальмг улс ик кезәнәс авн олн үртә бәәсмн, өрк-бүлнь өнр-өсклң, кесг үйнь хамдан ниитә бәәдг авъяс эндр чигн батрҗахнь темдгтә.

Тер мет орн-нутгин һардвр олн үртә өрк-бүлмүдиг урмдулхин төлә олн зүсн шаңһа дем йилһҗ өгнә. Мана аавнр-ээҗнр өнр өрк-бүлд өсәд, бийснь баһ гиснь тавн үр һарһҗ, өвкнриннь авг-бәрц хадһлсмн. Сүл цагт мана таңһчд баһчуд бас олн үртә эк-эцкнр болхар шундгнь байрта.
Целинн района Троицкое селәнд бәәдг Убушаевихнә бүлд дөрвн үрн өсчәнә. Денис Иванович Полина Геннадьевна хойр Москва балһснд таньлдад, 2012 җилд өркән өндәлһв. Цаг зуур Москвад, дарунь Хазн балһснд бәәһәд, хөөннь Хальмгтан хәрү ирв. Герин эзн Денис Иванович Целинн района медәтнрин Герт көдлнә, Полина авальнь болхла алс-зәәһин эв-арһар психологин халхар дөң-нөкдән күргнә. Дольган, Александр, Адьян һурвн көвүнь Троицкое селәнә дунд сурһульд сурна, кичәлмүдин хөөн спортын халхар дамшна, олн марһаст орлцад ончрна. Отхн Заяна болхла бичкдүдин садт орна, эн ду дуулхдан болн би биилхдән дурта. Алтн болсн дөрвн үрән эк-эцкнь өвкнрин авъясар өскчәнә. Денис Ивановичин келсәр, олн үртә эк-эцк хөвтә болдг. Үрдтән сурһуль болн чик сурһмҗ өгхлә, өсәд-босад, эрк биш нег-негән хәләһәд, дөң-тусан күргхнь лавта. Күн болһна җирһлд өрк-бүл онц орман эзлдг. Мел өрк-бүләс цугнь эклдг. Өрк-бүл гисн хамгин үнтә тоот болна, гиҗ эн темдглнә. Өнр-өсклң Убушаевихн өвкнриннь авъясан хадһлад, үрдән өскәд, эднә хөв-кишгинь үзҗ, цаһан хаалһар йовтха!
БАДМИН Занда

Видео