Номтнрин нөкцлт делгрәд бәәхмн

Сегодня, 12:18 | Общество, Таңһчин зәңгс, Зіњг, Сойл, Сурєуль-эрдм

Энткгин сойлын Өдрмүд Хальмг Таңһчд болҗасн кемд Хальмг ик сурһульд Бурхн-Багшин ном делгрүллһнд нерәдсн харһлт болв. Энүнд Энткгин ах элч Д.Джейсундхар, Москвад Энткгин элчллтин көдләчнр, Наландан болн Делин ик сурһульмудын номтнр ирв. Керг-үүлдвриг Хальмг ик сурһулин профессор Улана Мергн һардҗ, бурхн-шаҗна туск лекциг секлһнә тускар зәңгләд, Хальмг ик сурһулин һардач Салан Бадмд үг өгв.
- Хол Энткгәс ирсн күндтә мана гиичнриг Хальмг Таңһчин һазрт болн мана ик сурһульд өвкнрин авъясар йөрәҗ, эднд сәәхн җирһл, номин халхар улм өөдән күцәмҗ бәрхинь дурдҗанавидн, - гиҗ Бадм Катинович келв. – Эн өдрмүдт Элстд Энткг орн-нутгин сойлын Өдрмүд болҗана, эн керг-үүлдвр олнд урмд өгч, әмтнә седкл авлҗ, өврмҗтә орн-нутгин сойлла улм өөрхнәр таньлдх арһ өгчәнә. Энткгин соньн кесг фильмс үзүлгдв, мана Хальмг ик сурһульд крикет наадар оютнриг хамцулдг марһан болв.
Хальмг ик сурһуль Энткгин ик сурһульмудла нөкцлтән өргҗүлхәр бәәнә. Хальмг Таңһчд Энткгин сойлын Өдрмүд бүрдәлһнә керг-үүлдврин йовудт эн халхар хамцу үүлдврән шунмһадуллһна тускар тодрха күүндвр болв. Хальмгин болн Энткгин ик сурһульмудын хоорндк нөкцлт өргҗүллһнд Москвад үүлддг элчллтин сойлын төв нилчән күргхәр бәәнә гиҗ күндтә гиичнрин делегацин һардач Нандини Сингла келсмн.
Тиим кевәр Энткгин болн Хальмг Таңһчин ик сурһульмудын оютнр болн багшнр хамцу үүлдҗ чадхмн. Энткг орн-нутгин элчллтин зарлсн мөрәһәр хамцу төсвс күцәгдх. Энүнәс нань эмнлһнә, экологин, экономикин болн нань чигн халхар шинҗллтән кеҗ болҗана. Үдин хөөн Энткгин Наландан болн Хальмг ик сурһульмудын багшнр болн көдләчнр харһҗ, нөкцлтин зурасин тускар улм тодрхаһар күүндв.
Цааранднь Хазнд Энткгин ах элч Д.Джейсундхар үг келҗ, Бурхн-Багшин номар тиим лекциг җил болһн бүрдәҗ болҗана, тер номар хальмг оютнр шинҗллт кеҗ хамцу хату цаас авч чадҗана гиҗ темдглв.
Терүнә хөөн Наланда ик сурһулин доктор Праншу Самдарши болн Дели балһсна ик сурһулин доктор Чандан Кумар бурхн-шаҗна тууҗин тускар лекц умшв. Наланда болн Хальмг ик сурһульмуд нөкцлтән өргҗүлҗ бурхн-шаҗна сойлыг цааранднь делгрүлҗ чадхмн. Хальмг оютнр Наландан ик сурһульд кезәңк келәр, тер тоод санскритәр, медрлән гүүдүлҗ чадҗана. Энткгин болн Хальмг ик сурһульмуд, нөкцҗ бүклдән Әрәсән болн Энткгин хоорндк залһлда батруллһнд нилчән күргәд бәәх гиҗ күндтә гиичнр товчлв.
ТҮРВӘН Һуна

Видео