Өвкнрин санлынь күндлв

Сегодня, 12:31 | Общество, Таңһчин зәңгс, Зіњг

Алдр Диилврин Өдрлә Элстд санлын митинг болв. Өрүн эрт балһсна Долан хонгин күрәнәс һарад «Мөңк һал» бумблв күртл цуһар йовһар күрв. Хальмг Таңһчин һардвр, залврин болн Улсин Хуралын (Парламентин) элчнр, цергә шишлң керг-үүлдврин ветеранмуд, зөв-йос харлһна Элстин талдан бүрдәцсин элчнр болн Энткгин сойлын Өдрмүдт орлцхар таңһчд ирсн эн һазра элчллтин хойрдгч сегләтр Паван Кумар митингд орлцв.
Хаалһдан Баатрмудын аллейд зогсад, Советин Союзин Баатр Басан Городовиковин бумблвд гүрмр цецгүд тәвв. Дарунь «Мөңк һалд» күрәд, санлын митинг эклв. Хальмгин Толһач Хаска Бату Төрскән харсгч Алдр дәәнә ветеранмудла мендлҗ йөрәһәд, цецгүд болн белгүд бәрүлҗ өгв.
Драмин болн шог наадна таңһчин Орс театрин баахн артистнр ирлцңгү наадна тасрха үзүләд, дәәнә цагин туск шүлгүд чееҗәр умшв. Хальмг Таңһчин улсин артист Мергн Ким олнд темдгтә «Диилврин Өдр» ду дуулсн саамд, кесгнь асхрулад чигн авв.
– Найн негн җил хооран мана өвкнр әәмшгтә дәәнд орлцад, ааһ-цусан асхад, мана иргчин төлә зөргтәһәр дәәлдәд, диилвр делдв. Мана орн-нутгин олн келн-улсин элчнр ахнр-дүүнр мет ниитәһәр олна кергт ач-тусан күргсн болдг. Энүнә тускар дорас өсч йовдг үйнрт келҗ, медүлх зөвтәвидн. Орн-нутгин бүл болһнд тер дәәнд орлцсн баатрмуд бәәнә. Эн әрүн санлыг бидн мөңкинд хадһлад бәәхвидн, – гиҗ Хаска Бату темдглв.
Нидн зун насан зүүсн Төрскән харсгч Алдр дәәнә ветеран, күндтә медәт Петр Леонтьев нег һазра улсан Диилврин өдрлә йөрәһәд, цугтад цаһан хаалһ дурдв.
Митингин йовудт цергә шишлң керг-үүлдвр давҗадг һазрт ончрсн кесг дәәчнр болн Чернобылин АЭС-т болсн аюлын аш уга келһнд орлцсн Үлмҗин Савр Делгә Эрднин медальмүдәр ачлгдснь темдгтә болв. СВО-н йовудт баатр кевәр әмнәсн хаһцсн Владимир Серелеевин ачлврнь белвсрәд үлдсн Ольга авальднь бәрүлҗ өггдв. Бату Сергеевичин темдглсәр, ода болхла Ольга Серелеева һанцарн көвүһән өскчәнә. Эн туст бидн нөкд болад, цуг халхар энүг дөңнх зөвтәвидн гив.
Санлын керг-үүлдврин чилгчәр митингд орлцачнр «Мөңк һалд» гүрмр цецгүд тәвәд, нег һазра баатрмудын санлынь күндлв.
Хөн сарин 9-д цуг орн-нутгар тогтсн авъясар ирлцңгү керг-үүлдврмүд бас давулгдв. Москван Улан талвңд байрин парад болв. Онц темдглхд, нег һазра мана хәәртә үрн, Әрәсән Баатр Очр-Һәрән Нарн терүнд орлцснь бахмҗта болв.
– Әрәсән Баатр Очр-Һәрән Нарн Диилврин Өдриг орн-нутгин һол талвңд тосснь нег һазра улсин төлә байр-бахмҗ үүдәв. Төрскән харсгч Алдр дәәнә ветеранмудла хамдан зерглҗ сууһад, Әрәсән Президент Владимир Путинлә мендлсиг цуһар үзв. Нег һазра баатрмудын туурмҗнь мана таңһчин улст омгта йовдл болҗ, эдн әмд-менд хәрҗ ирхинь цуһар күләҗәнә, – гиҗ таңһчин Толһач Хаска Бату темдглсн болдг.
ОЛЬДАН Цаһан

Видео