Баһ үйд - Алдр Диилврин тускар

Сегодня, 12:47 | Общество, Таңһчин зәңгс, Зіњг

«Медрл» ниицән Алдр Диилврин Өдр угтҗ Хальмгин сурһульчнрин болн оютнрин төлә гегәрлтин керг-үүлдврмүд бүрдәв. Таңһчин сурһуль-эрдмин бүрдәцст Төрскән харсгч Алдр дәәнә туск лекцс, кичәлмүд, харһлтс болв. «Медрл» ниицәнә лектормуд дәәнә цагт болсн ик бәрлдәнә, залу-зөрмгин йовдлмудын тускар келҗ өгв.
Элстд бичкдүдин үүдәлтин бәәшңд болсн харһлтд Элст балһсна һардврин толһачин дарук, тууҗин номин кандидат Довгопола Дмитрий «Төрскнь баатрмудан тодлна: Төрскән харсгч Алдр дәәнә нертә улс» гидг төрәр лекц умшв. Салдсмудын зөрмгин тускар келсн деерән тылд эврәннь күч-көлсәрн Диилвриг өөрдхсн улсин, советин цага инженермүдин болн номтнрин үүдәҗ һарһсн эв-арһсин, сойлын болн үүдәгч эрдмин улсин ач-тусин тускар бас тодлв. Ода Элст балһснд дәәнд орлцсн зуг хойр күн бәәнә, эннь Андрей Васильевич Великородный болн Петр Леонтьевич Леонтьев гиҗ Дмитрий Сергеевич келв.
Әрәсән СоцТехин ик сурһулин Хальмг Таңһчд үүлддг әңгд, Приютное селәнә олн халхин гимназьд, Элстин лицейд болн балһсна олн халхин гимназьд бас соньн керг-үүлдврмүд болв. Сурһульчнр болн оютнр дәәнә туск фильмс хәләҗ, марһанд орлцад, фронтын баатрмудын, Алдр Диилврин темдгүдин, «Мөңк полк» керг-үүлдврин туск сурврмудт хәрү өгв. Долан хонгин кемд таңһчин талдан сурһулин бүрдәцст бас ирлцңгү керг-үүлдврмүд болв.
БАТАН Сәәхлә

Видео