Итальд ик сурһульд сурчана

Сегодня, 11:53 | Общество, Таңһчин зәңгс, Зіњг

Сурһулин җил төгсхдән өөрдҗ йовна, удл уга сурһульчнрин төлә шаңһа шүүврән өглһнә дааврта кем эклхмн. Күүкд-көвүд шүүврән сәәнәр өгхин төлә ик эртәснь белдвр кеҗ, тааста эрдм дасхар ик сурһульд орхар шунхмн. Элст балһсна 17-ч тойгта Көглтин Даван нертә дунд сурһулиг 2020 җилд төгсәсн Һәрән Ялмн бас шүүврән сәәнәр өгхин төлә арднь орҗ сәәнәр сурад, багшнртаһан немр кичәлмүдт белдвр кесн билә.
Күүкн тууҗин болн орс келнә шүүвриг йилһән сәәнәр өгәд, 100 балл хоршасмн. Англь келнә шүүврт болхла бас 99 балл хоршаһад, тер җилд сурһулян төгсәсн сурһульчнр дунд ик күцәмҗ бәрсн билә. Альмн МГИМО-д нарт-делкән хәрлцәнә дацңд орад, дөрвн җилин туршарт сурһулян сәәнәр сурв. Эн англь кел дахулҗ италь кел дассмн. Нарт-делкән хәрлцәнә туст гүн медрл хоршаһад, һазадын кел сәәнәр дасад, күүкн цааранднь магистратурт сурхар шиидв. Ик сурһульд сурхар 2 миңһн һар күн эрлһән орулад шүүврән өгсн билә, хальмг күүкн тедн дунд ончрсн болдг. Шүүврән сәәнәр өгсн хөрн күүнә тоод Һәрән Ялмн өрәл җилдән тенд сурад, англь болн италь келнә шүүвриг йилһән сәәнәр өгсн бийнь Итальд сурх шиидвр авсн болдг.
Давсн җилд Ялмн Рим балһснд Сапиенца ик сурһульд орв. Эн ик сурһуль 1303 җилд секгдсмн, тегәд нарт-делкәд нертә ик сурһуль гиҗ тоолгдна. Ялмн тенд нарт-делкән экономикин халхар сурчана. Келхд, кичәлмүд англь болн италь келәр болна. МГИМО-д гүн медрл авсн төләдән күүкн һазадын орн-нутгин ик сурһульд йилһән сәәнәр сурчана. Үвләр болсн шүүврмүдтән өөдән темдгүд авад, сән гисн оютнрин тоод орв.
Һәрән Ялмн өнр-өсклң өрк-бүлд өссмн, эдн ахнр-дүүнрәрн тавн болна. Цуһар эдн сурһулян сәәнәр сурад, таңһчин болн орн-нутгин марһаст шунмһаһар орлцҗ йовсмн. Алта дунд сурһулян төгсәснә хөөн МГУ-д йилһән сәәнәр сурад, ода тааста эрдмәрн көдлҗәнә. Төгрәш дү күүкнь орс келнә шүүвртән бас 100 балл хоршасмн, ода Москва балһснд ВШЭ–д сурчана. Пүрвә Н.Пироговин нертә медицинск ик сурһулин оютн, иргчдән эмч болхмн. Отхн Түмд Элст балһсна 17-ч тойгта дунд сурһулин 6-ч классин сурһульч, орс келнә болн эсвин таңһчин марһаст диилвр бәрсмн. Баатр Пюрвеевич болн Виктория Дорджиевна эк-эцк хойрнь күүкдтән чик сурһмҗ өгч, билг-эрдминь делгрүлҗ, цуг халхар эднән дөңннә.
- Ялмн Итальд сурһуль сурх шиидвр авхлань сансн санаһан эрк биш күцәх кергтә гиҗ селвг өгвидн. МГИМО-д магистратурт өңгәр сурчадг болв чигн күүкн нарт-делкән сурһульд сурхар зүткснь амр биш шиидвр болв. Өдгә цага баһчуд ик күцәмҗд күрхәр зүткдгнь бахмҗ үүдәнә. Күүнә һазрт һанцарн бәәһәд, хальмг нерән өөдән бәрҗ йовхнь байрта. Сурһулян сурдг деерән мана күүкн зуульчлад, нер һарсн музей-театрмудт одад, нарт-делкән билг-эрдмлә таньлдҗана. Өрәл җилдән тенд бәәһәд, Милан, Неаполь балһсдт одв, Швейцарьт амрад ирв. Бичкнднь эцкнь Ялмнд Миланд бәәдг «Ла Скала» оперин болн балетин театрин зург цуглулдг наадһа белглсмн. Тер зургиг үзчкәд, би эрк биш эн театрт одхв, гиҗ долата күүкмдн келснь тодлгдна. Одахн Ялмн нер һарсн тер театрт одад, сергмҗтә наад хәләснь энүнд бәәтхә, маднд ик бахмҗта йовдл болв, - гиҗ Виктория Дорджиевна келнә.
Сапиенца ик сурһульд цуг нарт-делкән һазрас оютнр сурчана. Энд оютнрт социальн патьр йилһҗ өгнә, өдр болһн хойр дәкҗ халун хотар өңгәр теткнә. Һазадын орн-нутгудас ирсн оютнр өөдән стипендь авна, нег сурһулин җилд тернь ут тоодан 7 миңһн евро тогтана. Ялмн Литваһас ирсн күүкнлә хамдан бәәнә. Хальмг күүкн Узбекистанас, Таджикистанас ирсн баһчудла үүрлнә, эдн хоорндан орсар күүнднә. Йирин Италин бәәрн улс болн багшнр энүнд цаһан седклән медүлҗ, ямр нег төр учрхла нөкд болна.
Олн үртә эк Виктория Дорджиевнан келсәр, Ялмн бичкнәсн авн дегтр умшхдан дурта, концертд одад, ду-би хәләхдән таасна. Москвад сурчасн цагтан күүкн үүрмүдтәһән дару-дарунь театрт, концертд оддг бәәсмн. Күүкнә нүднә харань төрхәрә цагасн авн му болв чигн эн мел һартан дегтр авснь үзгддмн гиҗ экнь тодлна. Ик тууҗта, нертә ик сурһулиг төгсәһәд, нарт-делкән экономик делгрүлх сән мергҗлт болтха гиҗ бидн Ялмнд дурдҗанавидн.
ДООҖАН Наталья
ЗУРГТ: Һәрән Ялмн Милан балһснд «Ла Скала» оперин болн балетин театрт одсн кем

Видео