Бичкдүдт хальмг кел дасхна

Сегодня, 12:35 | Общество, Таңһчин зәңгс, Зіњг

Төрскн келиг бичкнәснь авн дасхла туста болна гидг. Целинн района Вознесеновка селәнә бичкдүдин садын һардач Нусхан Светлана бас тиигҗ тоолҗана. «Бидн төрскн кел даслһнд һол оньган өгнәвидн. Яһад гихлә ода орн-нутгин болн таңһчин һардвр тиим неквр тәвҗәнә. Мана садт 6 баг бәәнә. Орс, даргин болн нань чигн келн- улсин бичкдүд манахсла хамдан хальмг кел дасна», - гиҗ Светлана Лиджиевна келнә.
Вознесеновка селәнә «Колосок» садт 92 күүкн-көвүн орна. Энд нурһлҗ бәәрн улс көдлҗәнә, эдн кергән сәәнәр меддг мергҗлтнр мөн. Тер тоод хальмг келнә багш Очра Цаһан бичкдүдт чик сурһмҗ өгч, кезәңк авъяс дасхна.
Вознесеновка селәнд ода сойлын Гер уга, тегәд олна керг-үүлдврмүд дунд сурһулин улд болна. Бичкдүдин садт ордг күүкд-көвүд ямр нег байрин концертд орлцҗ шүлгүд, йөрәл келҗ билг-эрдмәрн эк-эцкнртән бахмҗ үүдәнә. Хальмг келнә кичәлд эдн ахрхн мультфильмс хәләһәд, хальмг авъясла таньлдна, хот-хоолын, хувц-хунрин тускар медҗ авна. Хальмг би биилдгиг чигн бичкдүд дасна, эдн хальмг дуд дуулна. Эднә эк-эцкнр, аавнр-ээҗнр Цаһана болн Зулын, нань чигн нәр-нааднд орлцҗ кезәңк авъясмудын тускар келҗ өгнә.
Цаһан Санджиевнан үгәр, өдгә цага экнр-эцкнр хальмг келән сәәнәр медхш, гертән хальмгар күүндхш. Тегәд багш баһ наста эк-эцкнрлә онц кичәл давулад, келнә зокалыг цәәлһҗ өгнә. Тиим кичәл эднд таасгдна, аштнь эдн садын керг-үүлдврт бас шунлттаһар орлцна. «Хальмг келән өргҗүлх кергтә, нег үлү таңһчин һардвр эн кергт оньган өгхлә, бидн, хальмг келнә багшнр, цуг кергиг дөңнәд бәәхвидн. Эк-эцкнр ода төрскн келнә чинринь медҗ терүг дасх седклән медүлнә, тегәд эн туст бәәдл баһ-саһар ясрҗана. Мана сойл, кел, тууҗ хадһллһна кергт оньган өгәд бәәхлә, керг эрк биш бүтх», - гиҗ Цаһан Санджиевна тоолҗана.
Эврән эн Элстин Харти Кануковин нертә багшин училищ төгсәснә хөөн бичкдүдин садт ирҗ сурһмҗлачин нөкд болҗ көдлв. Училищт эн сән медрл авв, хөөннь Хальмг ик сурһулин хальмг келнә дацң төгсәһәд түрүләд сурһмҗлачар, хөөннь хальмг келнә багшар көдлдг болв. Бичкдүдт нерәдсн кесг көтлвр Цаһан Санджиевна өргнәр олзлна, кичәлин йовудт күүкд-көвүд кесг нааднд орлцҗ шин үгмүд дасна.
Бичкдүдин садмудт көдлдг хальмг келнә багшнрин таңһчин марһанд Очра Цаһан орлцад, сән дамшлт хоршав. «Ода марһан улм соньнар бүрдәгдҗәнә, нег үлү Цугәрәсән марһанд кесг региона элчнр орлцҗ соньн дамшлтарн хувалцна, тернь маднд төрскн кел дасхлһна эв-арһиг өргҗүлхд туслна. Хальмг РИПКРО-д болдг хальмг келнә багшнрин сурһульд, келн-улсин регионмудас мергҗлтнр ирнә, тернь бас мана көдлмшт туста болна»,-гиҗ Цаһан Санджиевна келнә.
Тиигҗ Вознесеновка селәнә бичкдүдин садын хальмг келнә багш Очра Цаһан дорас өсч йовдг үйнрт төрскн кел дасхч, эк-эцкнрлә хәрлцәһән батрулҗана.
ТҮРВӘН Һуна

Видео