Таңһчин автономин өөнд нерәдв

Сегодня, 13:35 | Общество, Таңһчин зәңгс, Зіњг

Хөн сарин 18-д Хальмг Таңһчин цуг сурһульмудт давулгдсн «Чинртә тоотын туск күүндвр» гидг кичәл мана таңһчин автономиг тогтасна 106 җилин өөнд нерәдгдв. «Медрл» ниицәнә таңһчд үүлддг әңгин орлцлһтаһар эн керг-үүлдвр бүрдәгдв. Тер мет таңһчин колледжмүдт бас тиим күүндвр болв.
150 сурһульмудын болн кесг колледжмүдин төлә «Медрл» ниицәнә лектор, Әрәсән цергә-тууҗин ниицәнә хальмг әңгин ахлач, тууҗин номин кандидат Довгопола Дмитрий хамцу лекц умшв. Хальмг Таңһч тавн зун шаху җилин туршарт Әрәсән келн-улсин ниитә өрк-бүлд орҗ кесг шаҗна элчнр энд үр-иньгин хәрлцә бәрҗ, төрскнч хәләц зүүҗәнә. Хальмг церг Әрәсән кесг дәәнд орлцҗ залу-зөргәрн йилһрҗ, орн-нутгин өмн үзгин меҗәг кесг зун җилин туршарт харсчасмн гиҗ эн күүндврин йовудт темдглв.
Элстин 20-ч тойгта сурһульд цуг классмудын һардачнр «Медрл» ниицәнә зургудыг, видеозурциг болн нань чигн тоотыг олзлҗ арвтнрла болн бичкдүдлә күүндвр кев (зургт).
11-ч классин сурһульчнрин төлә онц күүндвр болв, энд «Седвәр» гидг баһчудын төвин элч Һәрән Марина лекц умшв. Элст балһсна болн таңһчин райодын, селәдин сурһульмудт болсн күүндврт райодын болн СМО-син толһачнр, депутатнр, СВО-д орлцачнр, күндтә иргнмүд, ачта медәтнр, сойлын болн спортын элчнр орлцад, тодлврарн хувалцҗ, эврә отг-әәмгин тууҗин, нег һазра нүүрләчнрин тускар келҗ өгв.
ТҮРВӘН Һуна

Видео