Әмтнә иньгллт – алдр Әрәсән күчн

Сегодня, 13:02 | Общество, Таңһчин зәңгс, Зіњг

Әрәсән улсин ниицлтин җилд нерәдгдсн керг-үүлдврмүд мана орн-нутгт бәәдг олн келн-улсин сойл-тууҗ делгрүллһнд, әмтнә хоорндк иньгллтиг батруллһнд туслҗахнь лавта. Шидр таңһчин әмтнә социальн теткврин Төвд болсн олн келн-улсин билг-эрдмин наадм терүг иткүлҗ, бидн цуһар төрскнч седклтә улс болҗахиг медүлв. Өрк-бүлин нарт-делкән Өдрт болн Әрәсән улсин ниицлтин җилд нерәдгдсн керг-үүлдвр үр-иньглгч таалд давв.
Байрин керг-үүлдвриг залҗ давулсн бүрдәцин мергҗлтнр наадмд орлцачнрла олн келәр мендлҗ нәәриг эклв. Таңһчин әмтнә социальн теткврин Төвин һардачин дарук Хинән Светлана өрк-бүлин сән Өдрлә йөрәһәд, мана орн-нутгт бәәдг хойр зун шаху келн-улсин элчнр хоорндан ниитәһәр бәәхиг темдглв. Олн үртә, җирһлин күнд таалд туссн болн цергә шишлң керг-үүлдврт орлцачнрин өрк-бүлмүд олн келн-улсин сойлын наадмд орлцв. Эдн хальмг, орс, осетин, даргин, башкир, корей, цыһд улсин чигн авъясмудын, авг-бәрцин тускар келҗ өгәд, ду-бииһәрн байрлулв.
Цергә шишлң керг-үүлдврт орлцач Виктор Дрижеевин аваль Валентина Вероника болн Дмитрий үрдтәһән «Катюша» ду дуулв. Виктор болн Валентина арвн негн җил хооран өркән өндәлһсмн. Эдн 2024 җилд «Җилин сән гисн өрк-бүл» марһанд орлцад, баахн өрк-бүлмүд дунд диилвр бәрсмн. Дагинә Елена Занда күүктәһән хальмг улсин билг-эрдмлә таньлдулв, эдн хамдан би биилв, күүкд күн өрк-бүлин Өдрлә цугтаһинь йөрәв. Мулдан Занда Алтана күүктәһән осетин, Бадан Татьяна Дарина күүктәһән болн Тагир көвүтәһән даргин улсин, Алексән Нарн Зула көвүтәһән башкир, Панкадана Марина болхла Гилән күүктәһән корей улсин би биилв. Үлмҗин Санл болн Анна Максим Мишель хойр үрдтәһән цыһд болад, ке-сәәхн хувц өмсч кеерәд, һартан гитар авад биилснь олн-әмтнд таасгдв.
Олн келн-улсин билг-эрдмин наадмд мана таңһчд бәәдг даргин, хасг, корей улсин олна ниицәсин элчнр бас орлцад, иим керг-үүлдврмүд иньгллтин залһлда батруллһнд туслдгинь темдглв. Нег үлү дорас өсч йовдг бичкдүд олн келн-улсин сойлла таньлдҗ, ду-би дасч авхла ямр сән гиһит гиҗ эдн келв. Корей улсин олна ниицәнә ахлач Улана Натальян келсәр, эн бийнь Казахстанд өсәд-боссмн, Әрәсәд ик сурһульд сурад, хальмг көвүнд мордад, өнр-өсклң өрк-бүлтә болсндан байрлна. Эдн хальмг, орс, корей болн хасг улсин сән өдрмүд темдглдгчн. Валерия күүкнь эн нәәрт орлцад, корей улсин кеңкрг цокч өвәрц билг-эрдмәрн олна оньг авлв. Даргин улсин олна ниицәнә ахлач Магомед-Расул Умалатов тәвн тавн җилдән хальмг һазрт бәәхән медүләд, Хальмг Таңһчд йосндан иҗлдснә тускар келв. Эцкнь олн җил хооран Лаганя районд нүүҗ ирсмн, эдн хальмг һазрт олн үрднь һарад, энд хөвән олсн болдг.
Е.Толкачевин нертә «Тюльпанчик» ансамблин күүкд-көвүд орс, аварск болн узбекск би биилв, Хальмг Таңһчин улсин артистк Очкан Анна ду дуулҗ нәәриг кеерүлв. Керг-үүлдврин ашар Хинән Светлана наадмд орлцсн өрк-бүлмүдиг, келн-улсин ниицәсин элчнриг Ханлтын бичгәр ачлв. Дарунь нәәрт орлцсн бичкдүдиг шикр-балтаһар тоов.

ДООҖАН Наталья

Видео