Суворовин медаляр ачлгдв

Сегодня, 13:27 | Общество, Таңһчин зәңгс, Зіњг

Каран Мингиян Октябрьск района Ик Царң селәнд өсәд-босад, энд дунд сурһулян төгсәсмн. Хөөннь эн Б.Б.Городовиковин нертә Хальмг ик сурһульд орад, заллтын болн зөвин дацңгин оютн болв. 2023 җилд эн әәрмд мордад, Крымск арлд йовһн цергә полкд цөөкн сардан цергә даалһвран күцәҗ йовсмн. Дарунь аһар харслһна Крымин цергә әңгд йовулв, тенд хальмг көвүн әәмшг уга бәәдл тетклһнә халхар дааврта керг күцәҗәсн болдг.

Цергә даалһвран үнн-чик седклтәһәр күцәдг, ик дааврта, чаңһ-чиирг, үүрмүд дундан күндллһ олсн Каран Мингиян взводын һардачин дарук болад, эднә әңгд даалһсн кергиг өөдән кемҗәнд күцәҗ ончрсн мөн. Нег дәкҗ нисдг кергслмүд эдн тал дәврәд, ик әәмшг учрав. Каран Мингиян чадмгар һардад, залу-зөрмгән үзүләд, кергслиг уга кев. ПВО-н цергчнр бачм бәәдлд дарунь чик шиидвр авч, хортна кергслиг уга кесиг цергә негдлтин һардвр өөдәнәр үнлв.
Каран Мингиян цергәс бууҗ ирәд, Хальмг Таңһчд үүлддг Росгвардин әңгд көдлдг болв. Ода эн полицин сержант Октябрьск района ведомственн биш харулын цергллтд церглҗәнә. Шидр энүнд байрин бәәдлд Суворовин медаль бәрүлҗ өггдв. Октябрьск района толһачин үүл дааҗадг Хасыка Тимур болн района цергә комиссар Хагани Сафаров өөдән ачлвринь бәрүлҗ өгчәһәд, энүнә зөрмг йовдл тиигҗ үнлгдснь ик бахмҗ үүдәв гиҗ темдглв. Хагани Сафаров Әрәсән Президент Владимир Путинә зәрлг умшад, Залу-зөрмгән үзүлсн Төрскән харсач Каран Мингиян Суворовин медаляр ачлгдсна тускар зәңглв. Района һардвр нег һазра баатриг бүләнәр йөрәв.
Суворовин медаль өөдән чинртә шаңһа ачлвр мөн. Әрәсән Президентин зәрлгәс иштә 1994 җилин моһа сарин 2-ас авн терүгәр ачлдг болсмн. Эн ачлвр алдр генералиссимус Александр Суворовин нер зүүнә. Медалиг Төрскән харсад залу-зөрмгән үзүлсн цергчнрт бәрүлҗ өгнә.
ДООҖАН Наталья
ЗУРГТ: цергә шишлң керг-үүлдврт орлцач
Каран Мингиянд ачлвринь бәрүлҗ өгсн кем

Видео