Хальмг депутатнрин седвәриг дөңнв

Сегодня, 13:31 | Общество, Таңһчин зәңгс, Зіњг

Шидр Севастополь балһснд Әрәсән Өмн үзгин Парламентск Ассоциацин (ЮРПА) 44-ч хург болв. Хальмг Таңһчин Улсин Хуралын (Парламентин) Ахлач Артем Михайловин һардсн делегацин ханьд энүнә дарукс Бадмин Вячеслав болн Нуура Николай, депутатнр Кокан Михаил, Салан Бадм, Хаалһин Очр, Саңһҗин Лаг, Җанһан Чимид, Элдән Виктор, Цевгә Григорий болн Пүрбән Олег орв.
Артем Михайлов Әрәсән Өмн үзгин регионмудын зака үүдәгч хургудын һардачнрла хамдан Төрскән харсгч Алдр дәәнә цагт Севастополь балһс харсад әмән өгсн салдсмудын санлын бумбд гүрмр цецгүд тәвв. Дарунь Хальмг Таңһчин Улсин Хуралын Ахлач «Шин Херсонес» гидг музей-чонҗд болсн ЮРПА-н Хүүвин сүүрт орлцв. Зака үүдәгч Хургудын һардачнр хәләгдх төрмүд батлад, ЮРПА-н дарани хург Крым Республикд болх гиҗ шиидв. Артем Михайловд зака үүдәгч бүрдәцсин хоорнд залһлда батруллһнд ач-тусан күргсн төләднь Адыгея Республикин шаңһа Хүүвин «Долг. Честь.Совесть» гидг темдг бәрүлҗ өггдв. Эн республикин зака үүдәгч Хургин Ахлач Владимир Нарожный ачлвринь бәрүлҗ өгәд, цааранднь нөкцҗ үүлдхиг дурдв. Хальмг Таңһчин Улсин Хуралын Ахлач Севастополь балһсна, Запорожск болн Херсонск мүҗсин, Адыгея Республикин зака үүдәгч Хургудын Ахлачнрла нөкцлтин туск бооца батлв.
Хальмг депутатнр Әрәсән Өмн үзгин Парламентск Ассоциацин комитетмүдин сүүрт орлцв. Тиигәд, Нуура Николай келн-улсин хоорндк хәрлцәнә, Кокан Михаил болн Цевгә Григорий селәнә эдл-ахун болн йиртмҗ харлһна, Бадмин Вячеслав зака үүдәгч болн бәәрн залврин, Салан Бадм сурһуль-эрдмин, сойлын болн зәңгллһнә политикин, Хаалһин Очр хазна болн алвна, Элдән Виктор социальн политикин, күч-көлснә болн эрүл-менд харлһна, Саңһҗин Лаг тосхлтын, ЖКХ-н, энергетикин болн көлгн-күчнә, Җаңһан Чимид ветеранмудын керг-төрин болн төрскнч сурһмҗин, Пүрбән Олег экономикин болн промышленностин комитетмүдин сүүрмүдт хәләгдсн төрмүдәр ухан-тоолврарн хувалцв.
Хальмг Таңһчин Улсин Хуралын депутатнр һурвн закана седвәр татад, ЮРПА-н нерн деерәс Әрәсән Орн-нутгин Хүүвин Ахлач Вячеслав Володинә болн Әрәсән йиртмҗин көрңгин болн экологин министр Александр Козловин нернд дуудвр белдв. Терүнд һазр көдәрлһиг гетлҗ болн урһа модд суулһхин зокалд сольвр оруллһна керг-үүлдврмүдин тускар келгдҗәнә. Дәкәд тәрә тәрлһнд мөңг йилһҗ өглһнә туск төр босхгдв. ЮРПА-н хургт орлцачнр хальмг депутатнрин седвәриг дөңнәд, һазр көдәрлһнә төр хам-хоша бәәдг регионмудт бас нәрн болҗахас иштә терүг хаһлхин төлә хамцу үүлдвр күцәх кергтә гиҗ шиидв. Хургин йовудт дунд шишлң сурһуль-эрдмин, цергә шишлң керг-үүлдврт орлцачнриг дөңнлһнә, орн-нутгин болн региона хазнд алвна мөңг оруллһна туск закадын төсвс белдх седвәр батлв. Хальмг Таңһчин Улсин Хуралын Ахлачин дарук Нуура Николай болн депутат Салан Бадм парламентс хоорнд залһлда батруллһнд ач-тусан күргсн болн зака үүдәгч шунмһа үүлдвр күцәсн төләдән ЮРПА-н темдгәр ачлгдв. Ик хургин чилгчәр Крым Республикин делегацд Әрәсән Өмн үзгин Парламентск Ассоциацин туг бәрүлгдв.
БАТАН Наталья

Видео