Китд орн-нутгт болсн харһлтс

Сегодня, 13:33 | Общество, Таңһчин зәңгс, Зіњг

Эн җил Әрәсә Китд орн-нутгла иньгллтин болн нөкцлтин бооца батлгдснас авн дигтә 25 җил болв. РФ-н Президент Владимир Путинә темдглсәр, эн җилмүдин эргцд Әрәсән-Китдын хоорндк залһлдан улм батрад, сән йовудтаһар делгрҗ йовна. Китдын Толһач Си Цзиньпинә үрврәр мана орн-нутгин Толһач Владимир Путин хөн сарин 19-д Китд орн-нутгт одв. Әрәсән Залврин Ахлачин тавн дарук, Президентин һардврин болн бизнесин элчнр, арһлачнр болн орн-нутгин регионмудын Толһачнр делегацин ханьд орсмн. Йосна гиичллһнә йовудт 40 шаху бооцан батлгдв.
Хальмгин Толһач Хаска Батун һардвртаһар таңһчин йосна элчнр керг-төрин халхар Китд орн-нутгт бас одснь темдгтә болв. Хальмг Таңһчин Толһач Хаска Бату соньн кесг харһлтст орлцв. Әрәсән-Китдын ЭКСПО һәәхүлин йовудт XY Group нарт-делкән корпорацин президент Сюэ Синфала харһв.
XY Group – инвестиц оруллһна болн хулд-гүүлгәнә халхар Китдын хамгин нүүрлгч бүрдәц болна. Эн тосхлтын, энергетикин, хулд-гүүлгәнә, сән кец-таал тогталһна халхар үүлднә.
Дөчн шаху җилдән Әрәсәлә болн СНГ-н орн-нутгудла күцәмҗтәһәр нөкцлтҗәхинь заахмн. Мана орн-нутгин сойлын делгрлтд онц оньг тусхагдад, Харбин балһснд М.В.Ломоносовин нертә МГУ-н болн Үвлин бәәшңгин ирлцңгү бәәрн тосхгдв.
–Харһлтын йовудт энергетикин, тосхлтын, селәнә эдл-ахун болн номин халхар нөкцлтхәр үгцвидн. XY Group бүрдәц хамцу үүлдвр күцәхдән белн бәәхән медүлв. Иим чинртә нарт-делкән харһлтст орлцсндан бахтнав, Хальмг Таңһч Китдлә нөкцлтән цаарандан делгрүләд бәәхмн, – гиҗ Хаска Бату темдглв.
Тер мет Хальмгин делегац тосхлтын-инвестицин Китдын хамгин ик бүрдәцин һардачнрин Хүүвин ахлач Сунь Сюэфейла нөкцлтин халхар бас күүндв.
Хальмг Таңһчин элчнр тосхлтын, сән кец-таал тогталһна, көлгнә болн зуульчллһ делгрүллһнә халхар күцәгдҗәдг төсвсин тускар келҗ өгв. Кесгинь эндр чигн Әрәсән арһлачнрла болн тосхлтын бүрдәцслә хамдан күцәҗ болхинь темдглв.
Деер келгдсн төсвс сән йовудтаһар күцәгдәд, мана таңһчд көдлмшч шин ормс бүрдәгдәд, нарт-делкән нөкцлт улм делгрхнь лавта. Мана төрмүдт оньган тусхасн Сунь Сюэфейд Бату Сергеевич ханлтан күргв.
Тер өдр Хэйлунцзян провинцин губернатор Лян Хуэйлинлә бас харһлт болв. Келхд, эн провинц Әрәсәлә меҗәлнә, промышленностин, селәнә эдл-ахун, номин болн зуульчллһна халхар күцәмҗтәһәр делгрҗәнә. Терүнә йовудт залврин хоорндк залһлдаһан батрулад, хулд-гүүлгәнә-экономикин, нефтин-газин, АПК-н, сойлын, спортын болн зуульчллһна халхар хамцу үүлдврән шунмһадулхин тускар күүндвр һарв.
Тодлхас, Хальмг Таңһч Китдлә хамдан соньн төсвсән күцәҗәнә: махна зүүтә хот-хол болн тосхлтын материалмуд кеҗ һарһгдҗана. Тер мет Б.Б.Городовиковин нертә Хальмг ик сурһуль Хэйлунцзяна селәнә эдл-ахун ик сурһульла хамцу көтлвр үүдәһәд нөкцлтән өргҗүлҗәнә. Дәкәд болхла китд кел дасхар седҗәдг оютнрин то җил ирвәс өсәд йовна, гиҗ келх кергтә.
Хаска Бату мана таңһчд заллтын көдлмш яһҗ бүрдснә тускар цәәлһҗ келв. Таңһчин Толһач болсн деерән «Негдсн Әрәсә» партин региона әңгин сегләтр болҗахан бас медүлв. Залврин Ахлачар болхла Босхмҗин Гилән күцәмҗтәһәр көдлнә гиҗ темдглв. Лян Хуэйлин провинцин губернатор болн залврин Ахлач болна. Иим көдлмш нарт-делкән залһлда батруллһнд улм туслхнь лавта болхмн.
– Мадниг бүләнәр тосад, соньмслтта күүндвр тогтасн Лян Хуэйлинд ханлтан өргәд, мана таңһчд ирх үрвр кевүв.
Эн өдрмүдт Әрәсәд POWERCHINA корпорацин элч Ли Дуншула харһх саам бас учрв. Энергетикин нүүрлгч 14 бүрдәц нииләд эн корпорац тогтҗ. Гидроэнергетикин, хаалһс, тагтс, олн давхр гермүд болн усна сурвлҗна тосхлтсин халхар 130 һар орн-нутгт төсвсән күцәнә.
Харһлтын ашар Хальмгт энергетикин болн сән кец-таал тогталһна халхар нөкцлтән батрулхин туст шиидвр авгдв. Әрәсән-Китдын ЭКСПО һәәхүлин талвңгудт болсн харһлтс болн батлгдсн бооцас мана таңһчин делгрлтд туслхнь лавта.
КАРСАНА Евгения

Видео