Үлдчнә биичнр ончрв

Ар үзгин Осеть-Алания Республикин Владикавказ балһснд бииһин коллективсин марһан болв. «Созвездие талантов» гидг тер марһанд Хальмг Таңһчас. «Нарна Толян» гидг бичкдүдин бииһин коллектив орлцв. Приютна районд энүг әмтн сән меднә.
Бухан Церн һарддг эн коллектив Владикавказд болсн марһана дииләчнрин нер зүүв. Жюрин темдглсәр, эн ансамбль сән белдвртә болсн деерән бииһин эрдмәрн ончрҗ, би болһна өвәрцинь медүлҗ чадсн болна.
Үлдчн селәнә О.Д. Мукаеван нер зүүҗәдг гимназьд бичкдүдт төрскн кел, хальмг улсин авъясмуд дасхлһнд онц оньг тусхагдна. Күүкд-көвүд биилдг дассн деерән хальмг улсин урн- үгин болн сойлын зөөрлә таньлдна. Сурһульчнрин билг-эрдмиг делгрүллһнә халхар олн җилдән үүлдҗ йовдг Бухан Церн Әрәсән Федерацин олна дунд сурһулин күндтә көдләчин нер зүүнә.
Энүнә сурһульчнр олн-зүсн хәләврмүдт орлцна. Үлдчн селәнә бичкдүдин ансамбль билг-эрдмәрн Хальмгин нериг дуудулснь бахмҗта болв.

ҖИРҺЛИН Кермн