Сергмҗтәһәр амрна

Сегодня, 12:54 | Общество, Таңһчин зәңгс, Зіњг

Җил болһн хөн сарин һурвдгч бембә өдрлә скандинавск йовлһна Өдр болна. Эн керг-үүлдвр мана таңһчд бас сән авъяст тохрв гиҗ келҗ болҗана. Таңһчин әмтнә социальн теткврин төвин көдләчнр болн эднә хәләврт бәәдг медәтнр эн сән Өдрт нерәдҗ олн зүсн керг-үүлдвр бүрдәнә.

Шидр Элстд «Иньгллт» паркд социальн теткврин төвин көдләчнр болн «Эрүл-менд», «Одн», «Йога» болн «Цигун» негдлтсин медәтнр хамдан йовһар йовҗ, эн өдриг темдглв. Төвин һардач Светлана Романа келсәр, «Шунмһа кевәр ут нас насллһна» төсвин йовудт ах үйин улсин төлә олн зүсн негдлтс үүлднә. Медәтнр цогц-махмудан батрулна, билг-эрдмән делгрүлнә, шин эв-арһс дасна. Спортар соньмсдг медәтнрин төлә шишлң кергсл хулдҗ авгдсн бәәнә. Җил болһн «Скандинавск йовлһна өдр» болн «10 миңһн ишкдл» гидг керг-үүлдврмүд болна, терүнд медәтнр болн социальн көдләчнр шунмһаһар орлцна гиҗ Светлана Вячеславовна келнә.
Паркин хаалһсар йовхас урд цугтан көл-һаран тинилһәд, дамшач Галина Трухинан даалһврмуд күцәнә. Дарунь цугтан скандинавск модта йовһар йовна. Эн керг-үүлдврт орлцхар ирсн улс дунд Чучила Галина билә. Далн тавта медәтин келсәр, эн арвн җилин туршарт социальн теткврин төвин негдлтст орна. «Бидн долан хонгт һурвн дәкҗ цуглрад, цогц-махмудан батрулнавидн, биилнәвидн. Олн җилдән эрүл-менд харлһна халхд көдләд, ачта амрлһнд һарад, цаган тустаһар болн сергмҗтәһәр давулхар зүткнәв. Бидн олн зүсн керг-үүлдврт орлцҗ, баһ цаган тодлад, театр-музейд одад, хамдан амрнавидн. Ачта амрлһнд бәәдг медәтнрт талдан улсла харһад, үр-иньгин таалд цаган тустаһар давулснь ик урмд өгнә. Иим керг-үүлдврмүд ах үйин улст эрк биш кергтә», - гиҗ күүкд күн тоолҗана.
Элст балһснд бәәдг Елена Кичапова эн керг-үүлдврин тускар ниигмин сүлҗәнд умшад, терүнд бас орлцхар шиидв. Күүкд күүнд элгн-саднь скандинавск модд белглсн бәәҗ, тегәд эн көдлмшин хөөн асхн болһн балһсна уульнцсар йовна. Сүл җилмүдт хотл балһсна төв уульнцст сән кец-таал тогтагдв, тегәд йовһар йовхд сән болв гиҗ эн келв.
Скандинавск йовлһна өдрт нерәдсн керг-үүлдврт ут тоодан далн шаху күн орлцв. Эдн хамдан паркар йовад, хөөннь зурган цокулв. Бииһин негдлтин мергҗлт Эрднин Еленан һардврт медәтнр бииләд сергмҗтәһәр амрв.

БАТАН Сәәхлә

Видео