Мал асрснь олзта – орута болна

Сегодня, 13:12 | Общество, Таңһчин зәңгс, Зіњг

Хальмг Таңһчин социальн делгрлтин, күч-көлснә болн көдлмшәр тетклһнә министерств мал асрҗадг олн үртә өрк-бүлмүд дунд марһа давулҗ эдниг урмдулна. Нидн терүнд эврә эдл-аху бәрдг өрк-бүлмүд дунд Лаганя района Красинский селәнд бәәдг олн үртә Руслан болн Байирта Лагаевихн (зургт) диилвр бәрсн билә. Нег һазра улс, үр-иньгүднь болн элгн-саднь эдниг марһана йовудт дөңнәд, дууһан өгәд диилвр бәрснднь байрлв.
- Бидн ханьцад хөрн җилдән ниитә бәәнәвидн. Герин эзн бәәрн күн, энд өсәд-боссмн, би болхла Яшалтаһас мөн. Экм эн һазра күн, тегәд мана өрк-бүл нааран нүүҗ ирсмн. Авальтаһан хамдан 9-ч классас авн хамдан сурдг биләвидн, тегәд нег-негән сәәнәр меднәвидн. Бидн тавн үртәвидн, хойр көвүн болн һурвн күүкн өсчәнә. Ууһн Санчр ода церглҗәнә, Заян Элстд политехникин колледжд сурчана, Руслана болн Цаһан сурһульчнр, отхн Алтана ода хө мөстә. Селән һазрт өсәд-боссн төләдән бидн така, нуһс, үкр болн һаха бәрдг болвидн. Мана күүкд бичкнәсн авн мал асрҗ маднд нөкд болна. Махн, үсн, өндгн эврә эдл-ахуһас, сән чинртә, шимтә мах эд-бод кеһәд, үлүһинь киитрүләд хадһлнавидн, - гиҗ олн үртә эк келнә.
2025 җилд Лагаевихн района социальн харслтын цергллтд эрлһән орулад, социальн бооца батлв. Шаңһас йилһсн 200 миңһн арслңгар эдн үкрмүд хулдҗ авв. Олн үртә өрк-бүлд эннь ик урмдта болв. Селәнд бәәдг таньл-үзл улс бас социальн бооца батлад, мал хулдҗ авсн эс гиҗ эврә керг бүтәсн билә, тегәд Руслан болн Байирта теднә үлгүрәр көдлхәр седв. Ирлцңгү көтлврмүд олн үртә, баһ тетквртә өрк-бүлмүдт олзта-туста болна гиҗ Байирта Олеговна темдглнә. Ода эдн хойр үкрән сааһад, үлү үсинь селәндән эс гиҗ Лагань балһснд хулдна. Така-нуһсна һууҗмулмуд эдн намртнь бас хулдна, махнь эд-бод кегднә. Хоршаҗ авсн мөңгәр эдн малын хот хулдҗ авна, хаша-хаацан ясна, өрк-бүлин төрмүд чигн хаһлна.
Лаганя района һардврин селвгәр эдн олн үртә өрк-бүлмүд дунд зарлгдсн марһанд орлцад, эдл- ахудан асрдгин малын туск зурц цокч белдв. Селәнә бәәрн улс, элгн-садн эдниг дөңнснд ик ханлтта бәәнә. Эн марһанд диилвр бәрхвидн гиҗ нам ухалсн угавидн, гиҗ Байирта бер келнә. 100 миңһн арслңга мөрә авад, эдн ик киитрүләч хулдҗ авв, ода олн зүсн хот-хол хадһлҗ чадхмн. Диилвр бәрснә хөөн Лагаевихн дәкәд мал хулдҗ авхар шиидв. Өнр-өсклң эк-эцк хойр малан асрад, олзта-орутаһар көдлҗ тавн үрндән сән үлгүр болна. Ууһн Санчр дүүнрән хәләһәд, бичкнәсн авн эк-эцкдән нөкд болна. Эн әәрмд мордхиннь өмн Заян дүүтәһән Элстд бәәдг билә, тегәд хотан белдәд, нүдн-амн болдмн. 8-ч класст сурчадг Руслана 1-ч классин сурһульч Цаһанд герин көдлмш кехднь болна. Олн үртә эк олн зүсн цецгүдт дурта, герин хашаһинь урһа модд кеерүлнә.
- Чидл өгдг төрскн селәнд мана үрд һарв, энд мана үр-иньгүд бәәнә. Бәәсәрн байн, суусарн байн болад, күүкдтән чик сурһмҗ өгхәр шуннавидн. Мана күүкд бичкнәсн авн нег-негән хәләһәд, сән үрд болҗ өсчәнә. Өнр өрк-бүлин хөв-кишгнь тиим болдгчн, - гиҗ Руслан болн Байирта Лагаевихн йосндан байрлна.
ДООҖАН Наталья

Видео