Баатрмудын экднь нөкд болҗана

Сегодня, 13:20 | Общество, Таңһчин зәңгс, Зіњг

Яшкулин района Хулхт селәнә эргнд Төрскән харсгч Алдр дәәнә йовудт 1942 җилин үкр сард 28-ч Әәрмин дәәчнр догшн дәәлдәнд орлцҗ, хортна дәврлһиг зогсаҗ эн һазрас Хальмг Таңһчан немшнрәс эклҗ сулдхсмн. Тер өршәңгү уга бәәр бәрлдәнә тускар Хулхтын шидрк Төрскнә төлә әмән өгсн баатрмудын санлын бумб тодлулҗана.
Хөн сарин 9-д Алдр Диилврин Өдрлә болдг керг-үүлдврт Хулхт селәнә дунд сурһулин арвтнр җил болһн орлцҗ дәәчнрин санлынь күндлнә. Тер төрскнч сурһмҗин көдлмшиг багш - психолог Саңһҗин Ноһан һардна. Тер мет сурһулин «Движение первых» җисәнә үүлдврт ах классмудын сурһульчнр шунмһаһар орлцна.
Алдр Диилврин Өдрин өмн өргнд эн җисәнә элчнр селәнә медәт Һәрән Александрад нөкд болв. Александра Эрдниевнан Байр болн Санл көвүднь цергә шишлң керг-үүлдврт зөргтәһәр орлцад әмнәсн хаһцв. Күүкд геринь ахулад, хаша-хаацинь ясв. Көвүд герин һазакинь цеврләд, хог-богинь зөөҗ һарһад дигтә-дарата бәәдл тогтав. Тиим харһлтс сән авъяст тохрв, Александра Эрдниевна кезә чигн күүкд-көвүдиг күләҗ бүләнәр тосад, теднд дурта хотынь белднә. Ветерана хойр күүкнь эврә өрк-бүлтәһән Элстд бәәнә, экдән золһҗ бас дару-дарунь ирнә.
- Талдан чигн олна кергүдт мана ах классмудын сурһульчнр орлцна. Алдр Диилврин 81 җилин өөнин керг-үүлдвр угтад, эдн Хулхтын бумблвд сән таал тогтаһад, ирсн ветеранмудт дөңгән күргнә. СВО-д орлцачнрт буйнч седклин дөң күрглһнә кергт эдн бас эк-эцкнртәһән хамдан орлцна, - гиҗ Хулхт селәнә дунд сурһулин һардач Мухаран Надежда келнә.
Ода сурһулин герт бат ясвр кегдҗәнә, мөрн сарас авн эклсн көдлмш дигтә-даратаһар күцәгдҗәнә. Шин сурһулин җилд сурһульчнр шинрүлгдсн бәәрнд сурхмн гиҗ Надежда Очировна байрлҗана. 50 шаху җил хооран селәнд хойр давхр у-сарул гер тосхгдла. Тер цагт энд хойр зун һар сурһульч сурчала, ода теднә то кесг холванд баһрв. Дунд сурһуль селәнә һулмт болҗ төрскн һазра тууҗд зөвтә орман эзлҗәнә. Багшнр болн сурһульчнр бат ясвр төгсхиг теңкән уга күләҗәнә. Һаха сарин 1 шинд эдн эрк биш шин бүүртән нүүҗ орх гиҗ бат ицгтә бәәнә.
Баһ наста багшнр энд бас көдлҗәнә, тернь эклц классмудын, химийин болн биологийин багшнр болна. Надежда Очировна физикин багш болҗ 1985 җиләс авн энд көдлҗәнә. «Нанд эсвин кичәл таасгддг билә. Дамшлтта багш Генҗин Екатерина маднд бат медрл өглә. Тегәд Хальмг ик сурһулин физикин дацңд орсм тер. Ода оютнр багшин эрдм хая нег шүүҗ авна, яһад гихлә күцәх кергин кемҗәнь ик болв. Мана коллективд багшнр ниитәһәр көдлҗәнә», - гиҗ Надежда Очировна келнә.
Хамгин олар сурһульчнр дунд классмудт сурна. Шин сурһулин җилд негдгч класст ор һанцхн сурһульч ирх гиҗ эдн күләҗәнә. Селәнд газ бәәнә, тегәд бәәдл-җирһлин таал му биш, зуг усна төр хаһлгдад уга. Таңһчин һардвр эн туст баһ биш көдлмш күцәҗәнә, тегәд иргчдән селәнд чигн баһ наста багшнр нааран ирх гиҗ нәәлҗ болҗана.
Ода Хулхтын сурһульчнр шүүвртән белдҗәнә, кесгнь колледжд орхар зуралҗана.
ТҮРВӘН Һуна

Видео